काठमाडौं, श्रावण ६ ।
कोरोना संक्रमितहरू संख्या पछिलो केही समयदेखि बढ्दै गएपछि सरकारले अनिवार्य मास्क लगाउन सबैमा आग्रह गरेको छ ।

स्वास्थ्य तथा जनसंख्या मन्त्रालयले एक विज्ञप्ति जारी गर्दै विमानस्थल, हवाई यात्रा, सार्वजनिक यातायात तथा सार्वजनिक स्थानहरूमा अनिवार्य मास्क प्रयोग गर्न आग्रह गरेको हो ।

मन्त्रालयका सह–प्रवक्ता समिरकुमार अधिकारीले जारी गरेको सूचनामा गोष्ठी, सेमिनार, बैठकजस्ता भिडभाड हुने स्थलमा मास्कको अनिवार्य प्रयोग गर्न भनिएको छ ।

खोप नलगाएकाहरूलाई तत्काल खोप लगाउन पनि मन्त्रालयले आग्रह गरेको छ । नेपालमा अहिले २ हजार ५ सय ३७ जना कोभिडका सक्रिय संक्रमित रहेका छन् ।