काठमाडाैं, श्रावण ९ ।
२० वर्षमुनिको साफ च्याम्पियनशीपको उद्घाटन खेलमा नेपालले मादिभ्सलाई ४ विरुद्ध शून्य गोलले पराजित गरेको छ ।

भारतको भुवनेश्वरमा सुरु भएको प्रतियोगितामा नेपालकाे सामु माल्दिभ्सको टोली निरीह बन्न पुगेकाे थियाे । पहिलो हाफमा १ गोल गरेको नेपालले दोश्राे हाफमा लगातार ३ गोल थपेकाे थियाे ।

नेपालको तर्फबाट अभिषेक वाइबा, सुगम सुवाल, क्रितिशरत्न छुञ्जु र मनग्य नकर्मीले गोल गरेका थिए । खेलको ४१ औँ मिनेटमा वाइबा, ५७ औँ मिनेटमा सुवाल, ६२ औँ मिनेटमा पेनाल्टीमार्फत् छुञ्जु र इञ्जुरी समयमा नकर्मीले गोल गरेका हुन् ।

४ गोल गरे पनि नेपालले पाएको धेरै अवसरहरू गुमाएको थियो । यद्यपि माल्दिभ्सका खेलाडीहरूले पनि पाएका केही अवसरलाई गोलमा परिणत गर्न सकेनन् ।

च्याम्पियनशीपमा आयोजक भारतसँगै नेपाल, माल्दिभ्स, श्रीलंका र बंगलादेशको सहभागिता रहेको छ । नेपालले दोश्राे खेलमा बुधबार श्रीलंकासँग प्रतिस्पर्धा गर्नेछ ।

त्यस्तै, तेश्राे खेल आइतबार भारतसँग हुनेछ भने समूहको अन्तिम खेलमा मंगलबार बंगलादेशसँग प्रतिस्पर्धा गर्नेछ । लिग चरणका शीर्ष दुई टोलीले उपाधिका लागि प्रतिस्पर्धा गर्ने छन् ।