काठमाडौं, भाद्र १४ ।
नेपाली फिफा रेफ्री कविन ब्यञ्जनकार र फिफा असिस्टेन्ट रेफ्री युनाल मल्लले श्रीलंकामा हुने साफ यू–१७ च्याम्पियनशीपमा अफिसियलको भूमिका निर्वाह गर्ने भएका छन् ।

साफ यू–१७ च्याम्पियनशीप यही सेप्टेम्बर ५ तारिखदेखि १४ तारिखसम्म श्रीलंकामा हुने तय भइसकेको छ । उक्त प्रतियोगितामा ब्यञ्जनकार र मल्लले रेफ्रीको भूमिका निर्वाह गर्ने अखिल नेपाल फुटबल संघ (एन्फा) ले जनाएको छ ।

लिग कम नकआउट पद्दतिमा हुने प्रतियोगिताका लागि नेपाली युवा टोलीका मुख्य प्रशिक्षक उर्जन श्रेष्ठले २३ सदस्यीय टीमको घोषणा गरिसकेका छन् । नेपाल समूह ‘बी’ मा रहेको छ । नेपाल रहेको समूहमा भुटान र भारत छन् ।

नेपालले सेप्टेम्बर ७ मा भुटानसँग खेल्दै प्रतियोगिताको सुरुआत गर्नेछ । यस्तै, सेप्टेम्बर ९ मा नेपालले भारतसँग खेल्ने छ । समूह चरणको समाप्तीपछि शीर्ष दुई टीमले सेमिफाइनलमा स्थान बनाउने छन् ।