काठमाडौं, भाद्र २७ ।
नेपाल घरेलु मैदानमा जारी साफ महिला च्याम्पियनशीपको सेमिफाइनलमा प्रवेश गरेको छ । शज श्रीलंकालाई ६ विरुद्ध शून्य गोलले हराएसँगै नेपालले समूह ‘बी’ को विजेताको हैसियतले अन्तिम चारमा स्थान पक्का गरेको हो ।

नेपाल पाँचौँ पटक सेमिफाइनलमा पुगेको हो । साफ महिला च्याम्पियनीपका पाँच संस्करण भइसकेका छन् । तीमध्ये चार पटक नेपाल फाइनलमा पुगेको थियो । यद्यपि नेपाल अहिलेसम्म उपाधिविहीन छ ।

श्रीलंकामाथिको जितमा नेपालका लागि रश्मी कुमारी घिसिङ, सरु लिम्बु, अमृता जैशी र अमिषा कार्कीले गोल गरेका थिए । दशरथ रङ्गशालामा भएको खेलमा रश्मीले १० औँ मिनेटमा नेपाललाई अग्रता दिलाएकी थिइन् । एक मिनेटपछि नै सरुले अग्रता दोब्बर बनाइन् । १८ औँ मिनेटमा अमृता र पहिलो हाफ सकिनै लाग्दा दीपाले गोल गर्न सफल भइन् ।

दाेस्राे हाफमा अमिषाले दुई गाेल गरिन् । यही प्रतियाेगिताबाट राष्ट्रिय टीममा स्थान बनाएकी उनले दोस्रो हाफको ७७ औँ र अतिरिक्त समयमा गोल गरेकी थिइन् ।

नेपालसँगै भुटान पनि सेमिफाइनलमा पुगेको छ । नेपालसँग हारेको भुटानले श्रीलंकालाई पराजित गरेको थियो । यही नतिजाले भुटानलाई समूह उपविजेता बनाएको हो । साफ महिला च्याम्पियनशीपको इतिहासमा पहिलो जित दर्ता गरेको भुटानले पहिलो पटक नै समूह चरण पार गरेको हो ।

अब दुबै सेमिफाइनल खेल शुक्रबार हुनेछन् । पहिलो सेमिफाइनलमा भुटानले समूह ‘ए’ को विजेता र दोस्रो सेमिफाइनलमा नेपालको भेट समूह ‘ए’ को उपविजेतासँग हुनेछ । भोलि मंगलबार हुने भारत र बंगलादेशबीचको खेलले मात्रै समूह ‘ए’ को विजेता टुङ्गो लगाउनेछ । यी दुईको दुई–दुई खेलबाट ६–६ अंक रहेको छ ।