काठमाडौं, भाद्र ३१ ।
नेपाल छैटौँ संस्करणको महिला साफ च्याम्पियनशीप फुटबलको फाइनलमा प्रवेश गरेको छ । यसअघिका पाँच वटै संस्करणको विजेता भारतलाई हराउँदै नेपाल साफ च्याम्पियनशीपको फाइनलमा स्थान बनाउन सफल भएको हो ।

त्रिपुरेश्वरस्थित दशरथ रङ्गशालामा आज साँझ सम्पन्न सेमिफाइनलमा नेपालले भारतलाई १ विरुद्ध शून्य गोल अन्तरले पराजित गरेको हो । नेपालले महिला साफ च्याम्पियनशीपमा पहिलो पटक भारतलाई पराजित गरेको हो । मध्यान्तर अघिको खेलमा गरेको गोल नै नेपालका लागि निर्णायक बन्यो । पहिलो हाफको इञ्जुरी समयमा नेपालका लागि रश्मी कुमारी घिसिङले गोल गरेकी हुन् । मध्यान्तरपछिको खेलमा नेपाल र भारतका तर्फबाट गोल गर्ने प्रयास भएका थिए । दुबै टोलीले गोल गर्न नसक्दा पहिलो हाफमा गरेको एक मात्र गोलको मद्दतमा नेपाल फाइनलमा पुग्न सफल भयो ।

नेपाली टोलीको कप्तानी एन्जिला तुम्बाप्पो सुब्बाले गरेकी थिइन् । नेपाली टोलीकी मुख्य खेलाडी सावित्रा भण्डारी ‘साम्बा’ डेङ्गुका कारण खेल्न सकिनन् ।

नेपालले फाइनल खेल बङ्गलादेशसँग खेल्नेछ । यसअघि आजै सम्पन्न पहिलो सेमिफाइनल खेलमा भुटानलाई ८ विरुद्ध शून्य गोल अन्तरले हराउँदै बङ्गलादेश फाइनलमा प्रवेश गरेको हो ।