काठमाडौं, माघ १६ ।
करिब १३ महिना अघि कुक भिषामा जापान गएका नवलपरासी अमरपुरी–८ का ३३ वर्षीय सञ्जय खत्रीले आज झुण्डिएर आत्महत्या गरेका छन् ।

उनले भोलि नेपाल फर्किने भनेर हवाई टिकटसमेत काटिसकेका थिए । उनले जापानमा रोजगारीका लागि जान भनेर रु. १० लाख बढी पैसा तिरेर मासिक डेढ लाखभन्दा बढी तलब पाउने आशामा जापान पुगेका हुन् । उनका साथीहरूको भनाईअनुसार उनी केही समयदेखि मानसिक तनावमा रहेका थिए ।

उनले मुश्किलले महिनाको एक लाख रुपैयाँ मात्र तलब पाउँदै आएका थिए । उनी जापान जाँदा लिएको ऋणसमेत तिर्न नसकेको अवस्थामा कसरी नेपाल फर्किनु भन्दै मर्छु भन्ने गरेको उनका नजिकका साथीहरूले बताएका छन् ।

जापानको खानागावा केनको योकोहामा बस्दै आएका खत्रीले खानागावाको योकहामास्थित खानाजावा हाक्केई स्टेशननजिकको कोठामा आत्महत्या गरेका हुन् ।

घरमा श्रीमती र तीन वर्षीय छोरा छन् । उनको निधनपछि परिवारमा थप पीडासँगै उनलाई जापान पठाएको ऋण र उनको शव नेपाल फर्काउनसमेत अहिले समस्या भएको जनाएको छ ।