काठमाडौं, असोज ४ ।
नेपालमा डेंगु बिरामीको संख्या साढे १७ हजार नाघेको छ । स्वास्थ्य तथा जनसंख्या मन्त्रालयकाअनुसार २०७९ श्रावणदेखि हालसम्म देशभर डेंगु बिरामीको संख्या १७ हजार ५ सय ९४ जना पुगेको छ ।

हालसम्म डेंगुका कारण २१ जनाको मृत्यु भएको मन्त्रालयले जनाएको छ । देशका ७७ मध्ये ७५ जिल्लामा डेंगुका बिरामी भेटिएका छन् ।

२०६१ सालमा पहिलो पटक नेपालमा डेंगुको बिरामी देखिएका थिए । त्यसपछि नेपालमा प्रत्येक वर्ष डेंगु देखिएको छ ।

मन्त्रालयकाअनुसार सबैभन्दा बडी डेंगुका बिरामी वागमती प्रदेशमा देखिएका छन् । वागमतीमा हालसम्म १२ हजार ९ सय ४७ जनामा डेंगु देखिएको छ ।

यस्तै, प्रदेश १ मा ५ सय ६० जना, मधेश प्रदेशमा २ सय ६१ जना, गण्डकीमा ४ सय ९ जना, लुम्बिनीमा २ हजार ६ सय ४३ जना, कर्णालीमा २ सय ७ जना र सुदूरपश्चिम प्रदेशमा ५ सय ६७ जनामा डेंगु देखिएको मन्त्रालयले जनाएको छ ।