काठमाडाैं, असाेज ६ ।
काठमाडाैंकाे पुरानाे अस्पताल वीर अस्पताल अगाडि रहेका टहरामा रहेकाे औषधी पसलहरू हट्ने भएका छन् । काठमाडौं महानगरपालिकाले फार्मेसी सञ्चालकलाई २४ घण्टाभित्र औषधी पसल हटाउन निर्देशन दिएको छ तर, फार्मेसी सञ्चालकले भने महानगरपालिकाले भने जस्तो २४ घण्टाभित्र औषधी पसल (फार्मेसी) हटाउन नसकिने बताएका छन् ।

काठमाडौं महानगरपालिकाका प्रहरी प्रमुख राजु पाण्डेले आज बिहीबार दिउँसो १ बजेसम्म औषधी पसल नहटाए डोजर लगेर हटाउने जानकारी दिएका छन् । ती औषधी पसल हटाएर वीर अस्पताललाई कुनै हानी नगर्ने भन्दै नक्साविपरित रहेका औषधी पसल हटाएरै छाड्ने बताए । महानगरपालिकाका प्रहरी प्रमुख पाण्डेले बुधबार अपराह्न ३ बजे वीर अस्पताल परिसरमा गएर औषधी पसल सञ्चालकलाई २४ घण्टाभित्र पसल हटाउन निर्देशन दिएका थिए । यसअघि पनि वीर अस्पतालले उक्त टहरामा रहेका औषधी पसल हटाउन खोजेको थियो । प्रहरी प्रमुख पाण्डेले वीर अस्पताल अगाडि टहरामा रहेका औषधी पसलमा बगैँचा रहेकाले नक्साविपरित फार्मेसी सञ्चालन गरेकाले भत्काउन लागेको जानकारी दिए ।

वीर अस्पतालका निर्देशक डा. भुपेन्द्रकुमार बस्नेतले टहरामा रहेका फार्मेसी हटाउँदा अस्पताललाई कुनै हानी नहुने बताउँदै उनले सुरु–सुरुमा बिरामीलाई समस्या पर्ने भन्दै केही समयपछि समस्या समाधान हुँदै जाने बताए । ती फार्मेसीबाट अस्पतालले पनि मासिक लाखौँ आम्दानी गरिरहेको थियो । निर्देशक डा. बस्नेतले हाल औषधी पसल रहेको ठाउँमा नक्साअनुसार बगैँचा निर्माण गरिने जानकारी दिए ।

पाण्डेले यसअघि नै ३५ दिने सूचना जारी गरेको भन्दै बुधबार पुनः २४ घण्टाभित्र औषधी पसल नहटाए डोजर चलाइने जानकारी फार्मेसी सञ्चालकहरूलाई दिएको बताएका छन् । फार्मेसी सञ्चालक नवराज खनालले महानगरपालिकाले कम समय दिएर पसल हटाउने अल्टिमेटम दिएको जानकारी दिए । उनले कम्तीमा १५ दिनको सूचना जारी गर्नुपर्ने भन्दै औषधी बोरामा हालेर लैजान नमिल्ने भएकाले समय थप गर्नुपर्ने बताए । उनले कतिपय औषधी फ्रिजमा रहेकाले फ्रिजमा भएको औषधी तत्काल खाली गर्न नमिल्ने बताएका छन् ।