काठमाडाैं, असाेज १० ।
नेपाली राष्ट्रिय पुरुष फुटबल टोलीले भोलि मंगलबार बङ्गलादेशसँग अन्तर्राष्ट्रिय मैत्रीपूर्ण खेल खेल्दैछ । काठमाडौंको त्रिपुरेश्वरस्थित दशरथ रङ्गशालामा हुने उक्त खेल साँझ साढे ५ बजे हुने अखिल नेपाल फुटबल सङ्घ (एन्फा)ले जनाएको छ । विभिन्न प्रतियोगितामा नेपाल र बङ्गलादेश हालसम्म २६ पटक आमने सामने भएका छन् । जसमध्ये आधाभन्दा बढी खेलमा बङ्गलादेश विजयी भएको छ ।

नेपाल र बङ्गलादेशको पछिल्लो भेट भने सन् २०२१ मा माल्दिभ्समा भएको साफ च्याम्पियनशीपमा भएको थियो । त्यतिबेला नेपाल र बङ्गलादेशलले १–१ गोलको बराबरी खेलेका थिए । उक्त प्रतियोगिताको लागि एन्फाले भीआईपीतर्फ रु. १ हजार र साधारण प्याराफिटतर्फ रु. ५ सय मूल्य कायम गरिएको छ । त्यसैगरी, एन्फाले यस खेलका लागि भीआइपीतर्फको ८० वटा सिट रु. ५ हजारको दरले मूल्य तोकेको छ ।

फुटबल खेललाई सहयोग गर्ने चाहने व्यक्तिका कदर र सहजै टिकट उपलब्ध गर्नको लागि रु. ५ हजार मूल्य राख्ने निर्णय गरेको एन्फाले जनाएको छ । टिकट भने अनलाइन नभइ भौतिक रूपमा नै बिक्री हुनेछ । नेपाली टोलीमा कप्तान किरण चेम्जोङसहित विशाल श्रेष्ठ, दीपक कार्की, विकास कुथु, रोहित चन्द, अनन्त तामाङ, विकास तामाङ, दिनेश राजबंशी, विकास खवास, सुमन अर्याल, रेजिन धिमाल, सुदीप गुरुङ, तेज तामाङ र सेसेहाङ आङदेम्बे छन् ।

त्यसैगरी, विशाल राई, सुजल श्रेष्ठ, सुरज ठकुरी, एरिक विष्ट, विमल घर्तीमगर, अञ्जन विष्ट, हृतिक खड्का, मनिस डाँगी र आषिश चौधरी रहेका छन् ।