काठमाडाैं, असाेज ११ ।
नेपालले अन्तर्राष्ट्रिय मैत्रीपूर्ण खेलमा बंगलादेशलाई ३–१ गोल अन्तरले पराजित गरेको छ । नेपालको जितमा अञ्जन विष्टले ह्याट्रिक गोल गरे ।

दशरथ रंगशालामा भएको खेलको १७ औँ मिनेटमा बंगलादेशका कप्तान जमाल भुयानले प्रहार गरेको फ्रिकिक बल क्रस बारमा ठोकिएपछि बंगलादेशले अग्रता बनाउने मौका गुमाएको थियो । त्यसको एक मिनेटपछि अर्थात खेलको १८ औं मिनेटमा अञ्जनले हेडर गोल गर्दै नेपाललाई १ विरुद्ध शून्य गोलको अग्रता दिलाए । उनले विमल घर्तिमगरको फ्रिकिकमा हेड गर्दै गोल गोल गरेका हुन् ।

खेलको २७ औँ मिनेटमा नेपालले दोब्बर अग्रता बनाउन सफल भयो । यो पटक पनि अञ्जनले नै गोल गरे । विमल घर्तिमगरले मिलाई दिएको बललाई तेज तामाङले राम्रो प्रहार गरेका थिए । तर बंगलादेशका गोलकिपर अनिसुर रहमानले मुस्किलले बचाए । बंगलादेशका गोलपिकर रहमानले बचाउँदा रिबाउण्ड भएर आएको बललाई अञ्जनले गोल गर्दै नेपाललाई २ विरुद्ध शून्य गोलको अग्रता दिलाएका थिए ।

खेलको ३८ औँ मिनेटमा गोल गर्दै अञ्जनले ह्याट्रिक पूरा गर्दै नेपाललाई ३ विरुद्ध शून्य गोलको अग्रता दिलाए । विशाल राईले प्रहार गरेको फ्रिकिकमा उनले हेड गर्दै गोल गरेका हुन् । राष्ट्रिय टीममा अञ्जनको यो पहिलो ह्याट्रिक हो ।

खेलको ५५ औँ मिनेटमा बंगलादेशले गोल फर्कायो । बंगलादेशका सज्जाद हुसेनले गोल गर्दै ३–१ गोलको स्थितिमा पुर्‍याए ।

बंगलादेशविरुद्ध नेपाली राष्ट्रिय टीममा ऋतिक खड्का र आशिष चौधरीले डेब्यु गरेका छन् । खेलको ८१ औँ मिनेटमा सेसेहाङ आङ्दम्बेको स्थानमा ऋतिक खड्का र विमल घर्तिमगरको स्थानमा आशिष चौधरी मैदानमा प्रवेश गर्दै राष्ट्रिय टीममा डेब्यु गरे ।

बाँकी समयमा नेपालले गोल गर्ने केही राम्रो अवसर पाएको थियो । तर सदुपयोग गर्न नसकेपनि नेपालले बंगलादेशलाई ३–१ गोल अन्तरले पराजित गरेको हो ।