काठमाडाैं, असाेज १७ ।
नेपालीहरूको महान् चाड बडादशैँको आज आठौँ दिन महाअष्टमी । देशभर हर्षोल्लासपूर्वक शक्ति स्वरूपा माता महागौरीकाे पूजा आराधना गर्दै मनाइँदैछ ।

आश्विन शुक्ल प्रतिपदाका दिन पूजा कोठा दशैँ घर वैदिक विधिपूर्वक नवदुर्गा भवानीको आव्हान गरी घटस्थापना गरिएको स्थानमा आज भक्तिपूर्वक विशेष पूजाआजा गरिन्छ । महाअष्टमीका दिन शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्री, महागौरी, सिद्धिदात्री आदि देवीहरूको पूजा गरिन्छ ।

आज घर–घरमा राखिएका वा कलकारखानामा रहेका हतियारलाई सफा गरी महादेवी दुर्गाको हतियारको रूपमा स्थापना गरी पूजा गर्ने गरिन्छ । आज मध्यरातमा बलीसहित कालरात्रीको पूजा गर्ने परम्परा रहेको छ । विभिन्न शक्तिपीठमा पशु बली दिने चलन पनि रहेको छ ।

आजका दिन उपत्यकाभित्रका शक्तिपीठहरू गुह्येश्वरी, मैतीदेवी, कालिकास्थान, भद्रकाली, नक्साल भगवती, शोभा भगवती, बिजेश्वरी, इन्द्रायणी, रक्तकाली, बज्रयोगिनी, संकटा, बज्रबाराही, दक्षिणकाली, चामुण्डा, सुन्दरीमाई, बंगलामुखीलगायत मन्दिरहरूमा पनि बलीसहित पूजा आजा गर्नेहरूको बिहानैदेखि भीड लागेको छ ।

यसैगरी, उपत्यका बाहिरका गोरखाको मनकामना, पर्साको गहवामाई, सप्तरीको छिन्नमस्ता भगवती, धनुषाको राजदेवी, डडेल्धुराको उग्रतारा, काभ्रेपलाञ्चोकको चण्डेश्वरी, नाला भगवती र पलाञ्चोक भगवती, सिन्धुपाल्चोकको पलाञ्चाेक भगवती, दोलखाको कालिञ्चोक भगवतीलगायतका शक्तिपीठहरूमा पनि बलीसहित पूजा आराधना गर्ने श्रद्धालु भक्तजनहरूको घुँइचो लाग्ने गर्दछ ।