काठमाडौं, असोज २७ ।
बलात्कारको आरोप लागेका क्रिकेटर सन्दीप लामिछानेविरुद्ध अनुसन्धानका लागि जिल्ला अदालत काठमाडौंबाट आज दोश्रो पटक पाँच दिनको म्याद थप गरिएको छ । अदालतले यसअघि उनलाई सात दिन हिरासतमा राखेर अनुुसन्धान गर्न अनुमति दिएको थियो ।

१७ वर्षीया नाबालिगमाथि बलात्कार गरेको आरोपमा सन्दीप यही असोज २० गते त्रिभुवन अन्तर्राष्ट्रिय विमानस्थलबाट पक्राउ परेका हुन् । २० गतेबाटै सो म्याद लागू भएको थियो ।

प्रहरी वृत्त गौशालामा गएको भाद्र २१ गते सन्दीपविरुद्ध जाहेरी परेको थियो । सन्दीपले आफू निर्दोष रहेको दाबी गर्दै आएका छन् ।

पीडितका आफन्तले दिएको जाहेरीमा सन्दीपले भाद्र ५ गते राति काठमाडौंको एक होटेलमा नाबालिगमाथि पटक–पटक बलात्कार गरेको उल्लेख छ ।