काठमाडौं, कार्तिक २ ।
नेपाली क्रिकेट टोलीका पूर्वकप्तान सन्दीप लामिछानेलाई थप ४ दिन हिरासतमा राखेर अनुसन्धान गर्न जिल्ला अदालत काठमाडौंले अनुमति दिएको छ ।

काठमाडौं जिल्ला अदालतले आज घटनाको अनुसन्धानका लागि सन्दीपलाई थप ४ दिन हिरासतमा राख्न प्रहरीलाई अनुमति दिएको उनका अधिवक्ता सरोजकृष्ण घिमिरेले जानकारी दिएका छन् । उनले भने, ’प्रहरीले ७ दिन म्याद मागे पनि श्रीमानले ४ दिन थप्नु भएको छ । आइतबार प्रहरीलाई प्रतिवेदनसहित उपस्थित हुन भनिएको छ ।’

यसअघि जिल्ला अदालत काठमाडौंले असोज २४ गते २० गतेबाट गणना हुने गरी ७ दिनका लागि म्याद थप गरेको थियो । त्यसपछि असोज ७ गते अदालतले दोश्रो पटक ७ दिन म्याद थप गरेको थियो ।

गत भाद्र ५ गते १७ वर्षीया नाबालिगमाथि बलात्कार गरेको आरोप लागेका सन्दीपलाई गत बिहीबार प्रहरीले पक्राउ गरी असोज २४ गते अदालतमा उपस्थित गराएको थियो । दशैँ बिदाका कारण अदालत बन्द रहेकाले सन्दीपलाई नियन्त्रणमा लिएको ४ दिनपछि मात्रै म्याद थपका लागि अदालत लगिएको थियो ।