ललितपुर, कार्तिक १३ ।
ललितपुरकाे ऐतिहासिक नाच आजदेखि सुरु हुने भएकाे छ । करिब ३ सय ८१ वर्षदेखि निरन्तर रूपमा सञ्चालन हुँदै आएकाे कार्तिक नाच आज साँझबाट सुरु हुँदैछ । ललितपुरको ऐतिहासिक नाच यस वर्ष भने १० दिनसम्म चल्ने भएकाे छ । कार्तिक नाच संरक्षण समितिकाअनुसार कार्तिक २२ गतेसम्म मङ्गलबजारको दरबार स्क्वायरस्थित कार्तिक दबलीमा बेलुकी ७ बजेबाट नाच देखाइने भएकाे छ ।

हरेक दिनको नाचको लागि पाटन दरबार क्षेत्रमा रहेको नासल चोकमा ९० जना कलाकार भेला भएर नाचको तयारीमा व्यस्त हुने गर्दछन् । विशेष गरेर कृष्ण लिलामा आधारित नाचमा दिनैपिच्छे फरक-फरक नाचहरू देखाइनेछ । नाचमा दैत्य जगाउने परम्परासमेत रहेकाे छ ।

आज भक्त सुरदास प्याखँ देखाएर सुरु हुने कार्तिक नाच कार्तिक २२ गते दधिलिलाको नाच देखाएर समापन गरिनेछ । कार्तिक नाचको मुख्य आकर्षण भनेकाे नरसिंह अवतार कार्तिक २० गते देखाइनेछ । यस नाचमा राजोपाध्याय, श्रेष्ठ, प्रधान, अमात्य, जोशी, मल्ललगायत नेवार समुदायभित्रको विभिन्न जातको प्रतिनिधित्व हुने गर्दछ ।

नेपाल सम्वत् ७६१ सालदेखि निरन्तर रूपमा प्रदर्शन भइरहेको नाच यसपटक ३ सय ८२ वर्ष पुगेको छ ।