काठमाडाैं, कार्तिक १९ ।
वागमती प्रदेशमा लामखुट्टेको टोकाइबाट हुने डेङ्गु संक्रमणकाे बिरामीको सङ्ख्या ३३ हजारभन्दा बढी पुगेको छ । यो सङ्ख्या दिन प्रतिदिन बढ्दै गएको देखिन्छ । वागमती प्रदेशमा गत श्रावण महिनादेखि कार्तिक १८ गतेसम्ममा ३३ हजार ७ सय ६५ जनामा डेङ्गु संक्रमण पुष्टि भइसकेको वागमती प्रदेशको स्वास्थ्य निर्देशनालयले जनाएको छ ।

डेङ्गुबाट प्रभावित भएको प्रदेशका जिल्लामा सबैभन्दा बढी काठमाडौंमा रहेको छ भने सबैभन्दा कम रसुवामा रहेको निर्देशनालयबाट प्राप्त तथ्याङ्कमा उल्लेख गरिएकाे छ । काठमाडौंमा १३ हजार २ सय जनामा डेङ्ग संक्रमण भएका छन् भने रसुवामा ८ जनामा रोग पुष्टि भएको हो ।

यसैगरी, ललितपुरमा ९ हजार २ सय, मकवानपुरमा ४ हजार ६ सय ६९, भक्तपुरमा ३ हजार ६०, चितवनमा १ हजार ८ सय ५०, धादिङमा ८ सय ६० काभ्रेपलाञ्चोकमा ४ सय ८०, रामेछापमा १ सय ६८, सिन्धुपाल्चोकमा १ सय ६५, नुवाकोटमा १ सय ६८, सिन्धुलीमा १ सय ३३ तथा दोलखामा ८२ जनामा डेङ्गु संक्रमण पुष्टि भएको बताइएको छ । यस्तै, प्रदेशमा डेङ्गुबाट हालसम्ममा २१ जनाको मृत्यु भएको प्रदेश स्वास्थ्य निर्देशनालयले जनाएको छ ।