काठमाडौं, माघ १७ ।
व्यवस्थापिका संसद्अन्तर्गत आज बसेको बैठकमा सांसद्हरूले आ–आफ्ना जिल्लाका समस्या र देशको समसामयिक राजनीतिक अवस्थाबारे सरकारको ध्यानाकर्षण गराएका छन् ।

उनीहरूले शिक्षा, स्वास्थ्य, खानेपानी, वन संरक्षण, चोरी तस्करी नियन्त्रण, भूकम्प पीडितहरूलाई गृह निर्माणको रकम तत्काल उपलब्ध गराउनुपर्ने, स्थानीय तह पुनःसंरचना आयोगको प्रतिवेदन सदनसमक्ष प्रस्तुत गर्नुपर्नेमा जोड दिएका हुन् ।

एक मिनेट भित्रमा आफ्ना अभिव्यक्ति प्रस्तुत गर्नुपर्ने नियम पालना गर्न नसक्दा शून्य समयमा बोल्ने अधिकांश सांसद्लाई वाक्य पूरा गर्न हम्मेहम्मेसमेत परेको थियो । शून्य समयमा सांसद्हरू बलबहादुर महत, बलराम अधिकारी, बहादुरसिंह थापा, बुद्धिसागर चौधरी, भक्तबहादुर विश्वकर्मा, भरतबहादुर खड्का, यज्ञराज सुनुवार, रञ्जनाकुमारी सरदार र रञ्जना श्रेष्ठलगायत रहेका छन् ।