काठमाडौं, पुस १६ ।
शुक्रबार दिउँसो बानेश्वरको सडकमा पार्किङ गरी राखेको सरकारी गाडीमाथि आगजनी भएपछि त्यसको सर्वत्र विरोध भइरहेको छ ।
व्यवस्थापिका संसदको दोस्रो ठूलो दल नेकपा एमालेको भातृ संगठन युवा संघ नेपालका कार्यकर्ताले सरकारी गाडी तोडफोड गर्दै आगजनी गरेका हुन् । यसरी आगजनी गर्नेमा भीआइपीका नजिकका व्यक्तिहरू संलग्न रहेकाे भेटिएको छ ।

प्रहरी स्रोतकाअनुसार राष्ट्रपति कार्यालयका सहयोगीदेखि ठूला नेताका आफन्तसम्मले यस्तो अराजनीतिक हर्कत गरेको भेटिएको हो । आगजनीमा संलग्नमा रामजी सापकोटा, विपिन ढकाल, अशोक रावल र सुमित्रा थापा युवा संघका कार्यकर्ता हुन् ।

अशोक रावल पूर्वगृहमन्त्री तथा एमाले उपाध्यक्ष भीम रावलका भतिजो नाता पर्ने व्यक्ति हुन् । यता अर्का कार्यकर्ता सुमित्रा थापा राष्ट्रपति विद्यादेवी भण्डारीको सचिवालयका कर्मचारी हुन् । स्रोतकाअनुसार सुमित्राले समेत शुक्रबार राष्ट्रपति कार्यालयको गाडी चढेर युवा संघको कार्यालयमा पुगेकी थिइन् ।