काठमाडौं, माघ १८ ।
सरकारले २५ वर्षपछि लगानी सम्मेलनको तयारीमा जुटेको छ । लगानी सम्मेलनमार्फत एक खर्ब विदेशी लगानी भित्र्याउने सरकारको लक्ष्य रहेको छ । उद्योग मन्त्रालय र लगानी बोर्डले संयुक्त रूपमा फागुन १९ र २० गते काठमाडौंमा लगानी सम्मेलन गर्न लागिएको हो ।

यसअघि सरकारी तहबाट सन् १९९२ मा लगानी सम्मेलन भएको थियो । लगानी सम्मेलन नजिकै आइपुग्दा उद्योग मन्त्रालय र लगानी बोर्ड तयारीमा व्यस्त देखिएका छन् । सम्मेलनमा १० वटा मुलुकका सरकारी अधिकारी र निजी लगानीकर्ता सहभागी हुनेछन् । नेपाली तथा विदेशी गरी तीन सय जनाको सहभागिता रहने उद्योग मन्त्रालयका उपसचिव बिमल बरालले बताए । सम्मेलन लगानी सम्भाव्यता भएका नौ वटा क्षेत्रमा केन्द्रित हुनेछ ।

सम्मेलनका लागि लगानी बोर्डले ‘परियोजना बैंक’ बनाइरहेको छ । तीन प्रकारका परियोजनामा लगानीकर्ता माझ प्रस्तुत गरिने भएको छ । सम्मेलनको आकर्षण विस्तृत सम्भाव्यता अध्ययन भएका परियोजना हुनेछन् । तामाकोशी तेश्रो, निजगढ अन्तर्राष्ट्रिय विमानस्थल, रेलमार्ग जस्ता ९/१० वटा ठूला परियोजना अगाडि सार्ने बोर्डको तयारी छ ।

प्रारम्भिक अध्ययन भइसकेका ३०/३५ वटा परियोजना प्रस्तुत गरिनेछ । यसमा राजमार्ग, उत्तर/दक्षिण कोरिडोरलगायत परियोजना हुनेछन् । लगानी सम्भावना भएका तर अध्ययन नगरिएका परियोजना पनि अगाडि सारिनेछ । सरकारले सात प्रदेशमा हस्पिटल बनाउने भनेको छ । कतिपय ठाउँमा केबलकार, होटेल, रिसोर्ट, उद्योग सञ्चालन गर्ने तयारी भइरहेको छ । यस्ता परियोजनामा पनि स्वदेशी विदेशी लगानी जुटाउने सम्मेलनमा प्रयास हुनेछ ।

निजगढ विमानस्थल, काठमाडौं/तराई द्रूत मार्ग, बुढीगण्डकी जलविद्युत् परियोजना बनाउने मोडालिटी नै बनेको छैन । यी परियोजनामा ठूलो लगानी आवश्यक हुन्छ । सरकारले विदेशी लगानी भित्र्याउने निर्णय गरेमा एउटै परियोजनामा छ खर्बसम्म लगानी भित्र्याउनुपर्ने हुन्छ । एयरपोर्ट सिटीसहित निजगढ विमानस्थल बनाउन छ खर्ब लाग्ने प्रतिवेदन आइसकेको छ ।
आजको अन्नपूर्ण पोष्ट दैनिकमा समाचार छापिएको छ ।