काठमाडौं, माघ १८ ।
गाविस सचिव हकहित संरक्षण केन्द्रले राष्ट्रिय पुनःनिर्माण प्राधिकरणका प्रमुख कार्यकारी अधिकृत डा. गोविन्दराज पोखरेललाई नौ बुँदे ध्यानाकर्षण पत्रसहित आन्दोलनको चेतावनी दिएको छ ।

केन्द्रले आफूहरूको सेवा सुविधा वृद्धिलगायतका माग पूरा नभएको भन्दै बिहीबारदेखि गाविसको काम ठप्प पार्नेसमेत बताएको छ । ज्ञापन पत्र बुझ्दै प्राधिकरणका प्रमुख कार्यकारी अधिकृत डा. पोखरेलले भूकम्पले अति प्रभावित क्षेत्रमा दोश्रो किस्ता बापतको करिब १२ अर्ब रुपैयाँ वितरण गर्न पठाई सकेको भन्दै तत्काल आन्दोलन नगर्न आग्रह गरेका छन् । गाविस सचिवहरूले काम ठप्प पार्दा त्यसको प्रत्यक्ष मार भूकम्प पीडितहरूलाई पर्ने भन्दै डा. पोखरेलले माग पूरा गर्न केही समय दिन केन्द्रसँग आग्रह गरेका छन् ।

डा. पोखरेलले भने, ‘तपाईंहरूको माग सम्बोधनका लागि मैले पनि सक्दो पहल गर्नेछु तर, समय नदिएर एकै पटक काम ठप्प पारी आन्दोलनमा जानु व्यावहारिक हुँदैन ।’

दोश्रो किस्ताको आवास अनुदान रकम तत्काल बितरण गर्न प्राधिकरणले सरोकारवाला निकायलाई आग्रह गरिसकेको छ । गाविस सचिवहरूले काम ठप्प पारे भूकम्प प्रभावित क्षेत्रमा दोश्रो किस्ताको अनुदान बितरण कार्य प्रभावित हुनेछ । ध्यानाकर्षण पत्र बुझाउँदै केन्द्रका अध्यक्ष दामोदर रिजालले भोलिसम्म मागको सुनुवाई नभए गाविसको छाप बुझाएर काम ठप्प पारी आन्दोलनमा जानुको विकल्प नभएको बताएका छन् ।