काठमाडौं, फागुन १५ ।
रङहरूको पर्व फागु पूर्णिमा (होली) सुरु भएको संकेत दिन काठमाडौंको बसन्तपुरमा विधिवत् रूपमा चीर ठड्याइएको छ ।

बसन्तपुरमा रंगीचंगी ध्वजाले सजाइएको चीर सोमबार ठड्याइएपछि फागु पर्व सुरु भएको हो । फागुन शुक्ल अष्टमीका दिन चीर उठाएपछि देशभर फागु पर्व सुरु भएको मानिन्छ ।

बसन्तपुरस्थित हनुमानढोका दरबारको गद्दी बैठकको दक्षिणतर्फ सोमबार ३ तले चीर ठड्याएपछि देशभर फागु अर्थात् होली पर्व सुरु भएको मान्ने गरिन्छ ।

सोमबार बिहान ७ बजेर ४५ बजेको साइतमा मानन्धर समुदायले रंगीचंगी ध्वजासहितको ३ तले चीर ठड्याएका हुन् । सोही अवसरमा उनीहरूले एक–अर्कालाई अबिर दलेर होली पर्व सुरु भएको जनाउ दिएका हुन् ।