काठमाडौं, फागुन २१ ।
नेपालीहरू रङ्गको महान् पर्व फागु पूर्णिमाको सुखद् उपलक्षमा, वेलकम एड्भरटाईजिङ्गले आफ्नै प्राङ्गणमा आपसी एकता, सद्भाव, भाईचारा, मित्रता र प्रेमको प्रतिकको रूपमा रहेको रङ्गहरूको पर्व होली, सामाजिक परम्परा र संस्कृतिलाई निरन्तरता दिँदै “जीवन होलीका रङ्गहरू जस्तै उज्यालो र रंगिन होस्” भन्ने नाराका साथ विशेष कार्यक्रमको आयोजना गरी मनाएको छ ।

नेपाल विज्ञापन संघ (आन) का पूर्वअध्यक्ष एवम् वेलकम ग्रुपका अध्यक्ष निर्मलराज पौडेलले वेलकम ग्रुपमा कार्यरत कर्मचारीहरूलाई उत्सवको पर्व होलीको शुभकामनासहित होलीको रङ्ग लगाई दिँदै उनले “जीवन होलीका रङ्गहरू जस्तै उज्यालो र रंगिन होस्” भन्ने धारणा व्यक्त गर्दै यस्ता कार्यक्रमले कर्मचारीहरूबीच आपसी भाईचाराको राम्रो विकास हुनुका साथै आपसमा थप खुसी र विश्वास बढ्नेमा जोडसमेत दिएका छन् ।

एक आपसमा रहेका मनमुटाब बिर्सिएर आपसी सम्बन्धलाई अझ सुमधुर बनाउने माध्यमको रूपमा यस चाडको छुट्टै विशेषता रहेको छ । परापूर्वकालदेखि “असत्य माथि सत्यको विजय” को प्रतिकको रूपमा होली पर्व मनाइन्छ । कार्यक्रममा कर्मचारीहरू सेतो टि–सर्टमा होलीका विभिन्न रङ्गहरूमा रंगिएपछि होलीे पर्वको उत्साह छुट्टै देखिएको थियो ।