काठमाडौं, माघ १८ ।
गएको नोभेम्बर २९ मा कोलम्बियामा भएको विमान दुर्घटनामा चापेकोएन्सेका धेरै खेलाडीको ज्यान गएको थियो । उक्त विमान दुर्घटनामा टीमका १९ जना खेलाडीसहित २४ जना पदाधिकारीसमेत गरी ७१ जनाले गुमाउनु परेको थियो ।

उक्त विमान दुर्घटनापछिको पहिलो खेल खेलेको ब्राजिलको फुटबल क्लब चापेकोएन्सेले गएराति भएको खेलमा पहिलो जित दर्ता गर्न सफल भएको छ । चापेकोएन्सेले खेलमा इन्टर डि लागेसलाई २–१ गोलले हराउन सफल भएको हो । एरिना कोण्डा स्टेडियममा भएको खेलमा निल्टिन्हो र विलिङटनको गोलको मद्दतमा चापेकोएन्सेले जित निकालेको हो ।

यस्तै बिहीबार प्रिमिएर लिगअन्तर्गत भएको खेलमा जोइनभिल्लासँग गोलरहित बराबरी गरेको थियो । यसअघि, माघ ८ गते शनिबार भएको दुर्घटनापछिको पहिलो मैत्रीपूर्ण खेलमा ब्राजिलको लिग च्याम्पियन क्लब पाल्मेइराससँग २–२ गोलको बराबरी खेलेको थियो । चापेकोएन्से २२ नयाँ खेलाडी अनुबन्धसमेत गरेको छ । यस्तै नयाँ प्रशिक्षक पनि नियुक्त गरेका छन् ।

कोपा साउथअमेरकानाको फाइनल खेल्नका लागि कोलम्बिया जाने क्रममा विमान दुर्घटना भएको हो । दुर्घटनामा डिफेण्डर निटो र एलन रुस्चेल तथा गोलरक्षक ज्याक्सन फाल्लमान्नसहित छ जना विमान दुर्घटनामा बाँच्न सफल भएका थिए ।