काठमाडाैं, चैत ८ ।
असन जात्रा अर्थात नेपालभाषामा न्हि जात्रा आज बुधबार धुमधामका साथ सम्पन्न भएको छ । पाहाँ चर्‍हेभित्रकै यो एउटा महत्वपूर्ण जात्राकाे रूपमा लिइन्छ ।

यो जात्राअन्तर्गत असन चोकमा सुरुमा पहेँलो टोपीले सजिएका एक समूहले आफ्नो काँधमा लुँमधी भद्रकालीकाे खट बोकेर बाजागाजासहित असन परिसरमा परिक्रमा गर्न आइपुग्छन् । असन बजारमा लुँमधी भद्रकाली आएपछि जात्राको माहौल सुरु हुन थाल्छ । त्यसकाे केही समयपश्चात् निलो टोपी लगाएका अर्काे समूह पनि बाजागाजाका साथ आइपुग्छन् ।

उनीहरूले वचु भद्रकालीकाे खट बाेकेर असन परिसरमा परिक्रमा गर्न आइपुग्छन् । वचु भद्रकाली र लुँमधी भद्रकाली देवी सवार खट असन बजार पुगेपछि कंगेश्वरीको प्रतिक्षा सुरु हुन्छ ।

वचु भद्रकाली, लुँमधी भद्रकाली तथा कंगेश्वरी तीन दिदीबहिनीको भेटघाटको रूपमा पाहाँ चर्‍हेको न्हि जात्रा मनाउने गरिन्छ । असनमा प्रतिक्षारत् दुई देवीको खटलाई कंगेश्वरीको खटले तीन पटक असन परिसरमा परिक्रमा गरेपछि आगोको ज्वाला अर्थात नेपालभाषाान ति प्वाः आदान प्रदान गर्ने कार्य हुन्छ ।

त्यसपछि, अर्को वर्ष टुँडिखेलमा पुनः भेट गर्ने बाचाका साथ असन जात्रा अर्थात न्हि जात्रा सम्पन्न हुन्छ । यो जात्रालाई स्थानीयबासीले नेपालभाषामा ‘द्यः ल्वाकेगु’ जात्राकाे रूपमा मनाउने गरिन्छ ।

याे जात्रा हेर्नका लागि स्थानीयबासीलगायत विभिन्न जिल्लाबाट आएका मानिसहरूकाे ठूलाे भीडसमेत लाग्ने गर्दछ ।