काठमाडाैं, बैशाख ६ ।
बैशाख कृष्ण औँसीका दिन मनाइने आमाको मुख हेर्ने पर्व बैशाख ७ गते अर्थात् भोलि जन्म दिने आमालाई मिठा-मिठा परिकार खान तथा राम्रा कपडा लगाउन दिएर खुशी पारी मनाइँदैछ ।

शास्त्रमा उपाध्याय (पण्डित), आचार्य र पिताभन्दा पनि ठूली मानिएकी आमाप्रति श्रद्धा, भक्ति, सम्मान र आदर गर्ने तथा उनबाट शुभाशीर्वाद थाप्ने दिनका रूपमा लिइन्छ । बैशाख कृष्णपक्ष औँसीका दिनलाई नेपालीले मातातीर्थ औँसी अर्थात् मातृऔँसीका रूपमा समेत मनाउँछन् ।

सो दिन परदेशमा गएका छोराछोरीले आमाबाबुले गरेको त्याग र योगदानलाई कसैले कहिले पनि नभुलुन् भन्ने सन्देशसहितको गायक जे. बि. बिष्टले गाएको ‘सबै कुरा भूल तिमी आमाबुबा कहिले नभुल’ बोलको गीत निकै लोकप्रिय रहेकाे छ । बिष्टको सुमधुर स्वरले सुसज्जित मर्मस्पर्शी सन्देशमूलक सो गीतको भिडियो बजारमा उपलब्ध छन् ।

गीतमा स्वयं गायक बिष्टकै शब्द संगीत रहेको छ भने संगीत संयोजन किरण कँडेलको रहेको छ ।

देश-विदेशका रमणीय ठाउँहरूमा छायाँकन भएको उक्त भिडियोलाई सिनेम्याटोग्राफर रूपक पौडेलले खिचेका र सम्पादन गरेका छन् भने कन्सेप्ट देदिप्य रिमालको रहेको छ ।

निर्देशक पुष्कर अधिकारीको निर्देशनमा बनेको उक्त भिडियोमा रूपा पौडेल, जयराम फुँयाल, पार्वती पौडेल र रूपक पौडेलको बेजोड अभिनयसमेत देख्न सकिन्छ ।