काठमाडाैं, बैशाख १२ ।
दशकाैँदेखिकाे परम्परालाई याे पटक विश्राम लिने भएकाे छ । ह्यगृब भैरबनाथ तथा ३२ पाञेजु संघले यो पटक कीर्तिपुरको प्यंगःथाँमा प्रसाद नलैजाने भएको हाे ।

प्यंगःथाँमा मच्छिन्द्रनाथको प्रतिमूर्ति र याकः मिसाको मूर्ति बनाएर प्रतिस्थापना गरेको विरोधमा प्रसाद नलैजाने घोषणा गरेको हो । कीर्तिपुरका सुखी गःछेँ समाज टोल समितिले १५ मंसिर, २०७९ मा मूर्ति स्थापना गरेपछि ह्यगृब भैरबनाथ तथा ३२ पाञेजु संघले लिखित असहमति जनाएको थियो ।

पाञेजु संघको लिखित सहमति बिना हजारौँ वर्षदेखि कुनै मूर्ति नभएको मात्र मच्छिन्द्रनाथको प्रतिनिधि पात्र जलपाञेजुले प्रत्येक वर्ष थतिटोलदेखि नाङ्गो खुट्टाले हिँडेर याकः मिसालाई प्रसाद ग्रहण गराउनु पर्ने जीवित परम्पराको विरुद्ध मूर्ति स्थापना भएपछि प्रसाद नलैजाने संघका अध्यक्ष यज्ञरत्न शाक्यले जानकारी दिएका छन् ।

संघले गत २ पुसमा बैठक बसेर कीर्तिपुर प्यंगःथाँमा मच्छिन्द्रनाथ करुणामयको प्रतिमूर्ति र याकः मिसाको मूर्ति रहुञ्जेल प्रसाद ग्रहण गर्ने गराउने कार्य बन्द गर्ने निर्णय गरेको थियो ।

सुखी गःछेँ समाज टोल समितिलाई पुरातत्व विभागले पनि २ वटा पत्र पठाएर मूर्ति हटाउन ताकेता गरेको थियो । तर, पनि मूर्ति हटाउने काम नभएकोले प्रसाद लैजान नसक्ने शाक्यले बताए ।

‘प्यंगःथाँस्थित पौराणिक शिलाको उत्तर पट्टीको भित्तामा दक्षिण फर्काएर प्रतिस्थापना गरिएको मच्छिन्द्रनाथ करुणामयको प्रतिमूर्ति र याकः मिसाको मूर्ति उक्त स्थानबाट नहटाएसम्म प्रसाद ग्रहण गराउने कार्य हुँदैन’ शाक्यले जारी गरेको प्रेस विज्ञप्तिमा उल्लेख गरिएकाे छ ।

मच्छिन्द्रनाथको जात्रा अगाडि मंगलबजारको सोह्रखुट्टे पाटीमा बसी साइत हेरेपछि निस्केको उपर्युक्त साइतको ४ दिन अगाडि करुणामयको प्रतिनिधि स्वरूप जल पाञेजुले नाङ्गो खुट्टाले हिँडेर कीर्तिपुरमा रहेकी याकः मिसालाई प्रसाद ग्रहण गराउनुपर्ने जीवित परम्परा रही आएकाे छ ।

रातो मच्छिन्द्रनाथको प्रत्येक वर्ष पाटनमा गरिने जात्रा र १२ वर्षको १ पटक बुङ्गमतीबाट पाटनमा लामो रथ यात्रा हुने गरेको छ ।

संघका अध्यक्ष शाक्यकाअनुसार रातो मच्छिन्द्रनाथको नित्य पूजा कर्म गर्न गुठी संस्थानले वंशजको आधारमा २४ जना शाक्य थरका र ७ जना बज्राचार्य थरका पुजारीहरू नियुक्त गर्ने धार्मिक तथा ऐतिहासिक परम्परा रहेको छ । शाक्यकाअनुसार कीर्तिपुरमा मूर्ति स्थापनाको विरोधमा सबै पुजारी एकमत रहेका छन् ।