काठमाडौं, बैशाख २६ ।
हरिवन नगरपालिकाद्वारा स्वास्थ्य सेवा विस्तार योजनाअन्तर्गत विविध स्वास्थ्य सेवाका लागि टेलिमेडिसिन कार्यक्रम सञ्चालनमा आएको छ । टेलिमेडिसिन सेवाको उद्घाटन मधुमेह तथा थाईराइड विशेषज्ञ डा. ज्योति भट्टराईद्वारा हरिवन–४ निवासी कान्छीमायासँगको भिडियो सम्वादमार्फत् गरिएको थियो ।

नगरपालिकाको विशेषज्ञ सेवाअन्तर्गत डा. नरेन्द्र मैनालीद्वारा प्रत्येक महिना १०० भन्दा बढी बिरामीहरूको चेकजाँच गर्दै आएका छन् । यस कार्यक्रम तेश्रो महिनासम्म आईपुग्दा सेवा थप गर्दै डा. अरुण कुँवरद्वारा मानसिक स्वास्थ्यसम्बन्धी चेकजाँच तथा निःशुल्क औषधी वितरण कार्य हुँदै आईरहेको छ । यसका साथै बालबालिकाहरूको मानसिक रोगसम्बन्धी तीन दिने प्रशिक्षण कार्यक्रम पनि सम्पन्न भईसकेको छ । हालसम्म १ सय ५० भन्दा धेरै स्वास्थ्यकर्मी, जनप्रतिनिधि तथा शिक्षक–शिक्षिकाहरूलाई अभिमुखीकरण तालिम प्रदान गरिएको छ । १ सय ६४ जना मानसिक रोगीहरूको स्वास्थ्य जाँच गरी १०–१२ जना गम्भीर प्रकृतिका मानसिक रोगीहरूको पहिचान गरी थप उपचारका लागि सिफारिस गरिएको छ ।

कार्यक्रम सञ्चालन गर्नका लागि सहयोग गर्नुहुने बिशेषज्ञ डाक्टरहरू डा. अरुण कुँवर, डा. नरेन्द्र मैनाली, डा. ज्योति भट्टराई, डा. अमित झा, सिविन नेपालका तर्फबाट प्राविधिक सहयोग जुटाउनु हुने कुमार भट्टराई, तथा अन्य व्यवस्थापनमा सहयोग गर्नुहुने युवराज बुढाथोकीलगायत सम्बद्ध सबै पक्षलाई नगरपालिकाको तर्फबाट धन्यवाद ज्ञापनसमेत गरिएको थियो ।