काठमाडाैं, जेठ ११ ।
नेवार समुदायले आज सिथि नखः पर्व धूमधामसँग मनाउँदै छन् । जेष्ठ शुक्ल पक्ष कुमार षष्ठीका दिन यो पर्व मनाउने गरिन्छ ।

वर्षायाम र धानको रोपाइँ सुरु हुनुभन्दा पहिले यो पर्व मनाइन्छ । काठमाडौं उपत्यकामा आजको दिन पानीको मूल सफा गर्ने पर्वका रूपमा मनाउँदै आइएको छ ।

नेवार समुदायले इनार, पोखरी, ढुङ्गेधारालगायतका पानीको श्राेत सफा गर्ने गर्छन् । परापूर्वकालदेखि चलिआएको परम्पराले अहिले पनि निरन्तरता पाएको हो ।

वर्षात्‌को बेला बगेर आउने भेल र फोहोर पानी खानेपानीको मुहानमा मिसिएर पानी दूषित नहोस् भनी पानीको मुहान र श्राेतको वरिपरिसमेत सरसफाई गरी निकास खोल्नु यसको विशेषता हो ।

साथै हिउँदमा पुरिएको, थुनिएको र सुकेको मूललाई वर्षात्‌को पानीले फुटाउने भएकाले पनि सिथि नखःको दिन पानीको मूलको सफाइ गर्ने गरेको हो ।

सिथि नखःकै दिन भगवान कुमारको जन्मदिन पनि भएकाले नेवार समुदायले कुमारको पुजा गरी मास, मुगी, केराउलगायतको दालको बारा बनाएर खाने प्रचलन पनि सदियाैँदेखि रही आएकाे छ ।

त्यसैगरी, घरमा भर्खर भित्रिएको नयाँ गहुँको म्हुछ्यामढी (मुठ्ठी पारी बनाइएको विषेश खालको रोटी) समेत खाने गरिन्छ ।