काठमाडौं, माघ १८ ।
प्रधानमन्त्री पुष्पकमल दाहालले क्रान्तिको उपलब्धि संरक्षण गर्न स्थानीय तहको निर्वाचन अति आवश्यक रहेकोमा जोड दिएका छन् ।

माओवादी घटकमा आबद्ध युवाको एकता बैठकलाई आज सम्बोधन गर्दै उनले निर्वाचनलाई जसरी पनि सम्पन्न गराउने र त्यसैका लागि सम्पूर्ण तयारी गरिएको बताए । केही दिनभित्रै स्थानीय निकायको निर्वाचनको मिति घोषणा गरिने जानकारी दिँदै उनले निर्वाचन परिवर्तन चाहने र नचाहने प्रवृत्तिबीचको सङ्घर्ष भएको उल्लेख गरे ।

स्थानीय निकायको निर्वाचन हुन नदिएर सङ्घीयता नै असफल बनाउने खेल भएको भन्दै प्रधानमन्त्रीले कुनै पनि द्विविधा नराखी निर्वाचनमा क्रियाशील हुन सबै राजनीतिक दललाई आग्रहसमेत गरेका छन् ।

परिवर्तनकारी शक्तिलाई विजयी गराउन युवा विद्यार्थीले विशेष योजनाका साथ काम गर्नुपर्ने स्पष्ट पार्दै उनले आगामी माघभित्र तीन वटै तहको निर्वाचन सम्पन्न हुने उल्लेख गरे । विश्वव्यापी रूपमा दक्षिणपन्थी हावा बगेको भन्दै प्रधानमन्त्री दाहालले नेपालमा पनि त्यसैलाई अगाडि बढाउन खोजिएकाले क्रान्तिकारी युवाले सत्य कुरा नेपाली जनतालाई बताउनुपर्ने स्पष्ट पारे ।

उनले भने, ‘परिवर्तनलाई कसरी सङ्कटमा पार्न सकिन्छ भनेर केही तत्व लागेको छ । त्यो चरित्रलाई परास्त गर्नु जरुरी छ । नेपाली जनताले प्राप्त गरेको उपलब्धिलाई संस्थागत गर्नु आजको प्रमुख आवश्यकता हो । त्यो काम केवल युवाले मात्रै गर्न सक्छन् ।’

उनले युवालाई रोजगारी, क्षमताको विकास तथा सशक्तीकरणका लागि सरकारकातर्फबाट केही योजना सार्वजनिक गर्ने तयारीमा रहेको समेत जानकारी दिए ।

माओवादी केन्द्रसँग १० माओवादी घटकबीच गत जेठमा एकता भए पनि युवा सङ्गठनबीच भने औपचारिक रूपमा एकता हुन सकेको थिएन । आजको बैठकले सबै युवा सङ्गठनलाई एकीकृत गरेर वाईसीएललाई पुनः सशक्त प्रभावकारी सङ्गठनका रूपमा अगाडि बढाउने निर्णय लिएको वाईसीएलका नेता रामप्रसाद सापकोटाले जानकारी दिए ।