काठमाडौं, जेठ २२ ।
धार्मिक टेलिश्रृंखला महाभारतमा ‘शकुनी मामा’ को भूमिकामा देखिएका गुफी पेन्टलको निधन भएको छ ।

आज सोमबार बिहान ७८ वर्षको उमेरमा उनको निधन भएको हो । भारतीय सञ्चारमाध्यम दैनिक भास्करकाअनुसार उनलाई ८ दिनदेखि मुम्बईको अंधेरीस्थित एक अस्पतालमा भर्ना गरिएको थियो । उनी लामो समयदेखि मुटु र मृगौलासम्बन्धी बिरामी थिए ।

उनको आजै अन्तिम संस्कार गरिने भारतीय सञ्चारमाध्यममा उल्लेख गरिएको छ ।

महाभारतमा अर्जुनको भूमिका निर्वाह गरेका अभिनेता फिरोज खानले शोक व्यक्त गरेका छन् । ‘गुफीको पछिल्लो दुई दिनदेखि होस आएको थिएन । उनी आइसीयूमा थिए । गुफीकै कारण मैले महाभारतमा काम पाएको थिएँ । यसको लागि म सधैँ उनीप्रति कृतज्ञ रहने छु,’ उनले भने ।

गुफीले सन् १९७५ मा ‘रफू चक्कर’ बाट बलिउडमा उदाएका थिए । तर उनी सन् १९८८ मा बीआर चोपडाको शो ‘महाभारत’ बाट चर्चामा आएका थिए ।

उनी पछिल्लो समय स्टार भारतको शो ‘जय कन्हैया लाल की’ मा देखिएका थिए ।