काठमाडौं, जेठ २६ ।
उपचारको क्रममा लापरबाही गरेको कारण बिरामीको मृत्यु भएको भन्दै मृतकका आफन्तले ललितपुरको ग्वार्कोस्थित बी एण्ड बी अस्पताल घेराउ गरेका छन् । बुधबार धादिङमा दुर्घटनामा परेका स्थानीय गोविन्द ढुङ्गानाको उपचारमा अस्पतालले लापरबाही गर्दा बिरामीको मृत्यु भएको आफन्तले आरोप लगाएको छ । मोटरसाइकलले स्कुटरलाई ठक्कर दिँदा सामान्य घाइते देखिएका नीलकण्ठ-५ धादिङका गोविन्द ढुङ्गाना तथा उनकी श्रीमतीको उपचारका लागि ललितपुरको ग्वार्कोस्थित बी एण्ड बी अस्पताल ल्याइएको थियो । बुधबार अपरान्ह दुर्घटना भएपछि धादिङमै प्राथमिक उपचार गरी काठमाडौं पठाइएका ढुङ्गानाको बिहीबार बिहान ५ बजे बी एण्ड बी अस्पतालमा मृत्यु भएको थियो ।

मृतकका आफन्त नवराज ढुङ्गानाकाअनुसार बुधबार धादिङको बेनीघाट रोराङ गाउँपालिका-५, चारघारेस्थित पृथ्वी राजमार्गमा धादिङको नीलकण्ठ नगरपालिका-५ का ढुङ्गाना सवार बागमती प्रदेश ०२–०१६ प २१३९ नम्बरको स्कुटरलाई बाटो काट्दै गर्दा ना. १६ प २६२१ नम्बरको मोटरसाइकलले ठक्कर दिएको थियो । मोटरसाइकलको ठक्करपछि स्कुटरमा सवार ढुङ्गाना र उनकी पत्नी घाइते भएका थिए । घाइतेको थप उपचारका लागि बी एण्ड बी अस्पताल पुराइएकामा श्रीमतीको बाहिरी चोट मात्रै देखिएको कारण बुधबार राति नै टाँका लगाएर डिस्चार्ज गरिएको थियो ।

गोविन्दको कुममा भने चोट देखिएको कारण सामान्य अप्रेशन गर्नुपर्ने भनिए पनि सिटी स्क्यान भने गरिएको थिएन । हिँड्डुल गर्न र बोलचाल गर्न सक्ने भए पनि सामान्य घाइते भन्दै अस्पतालले उपचारमा चासो दिएको थिएन । तर बिहीबार बिहान ५ बजेर १० मिनेटमा ढुङ्गानाको मृत्यु भएको थियो । अस्पतालले गोविन्दको मृत्युको कारण हृदयघात भनी रिपोर्ट दिएको थियो । तर बिरामीका आफन्तलाई चित्त नबुझेर उनीहरूले पाटन अस्पतालमा लगी पोष्टमार्टम गराएका थिए । पोष्टमार्टम रिपोर्टमा भने सर्भाइकल इञ्जुरी र आन्तरिक रक्तश्राव मृत्युको कारण रहेको रिपोर्ट दिएको थियो ।

आरटीए अर्थात् सडक दुर्घटनाका बिरामी उपचारका लागि आउँदा सिटी स्क्यान अनिवार्य शर्त हो । तर बी एण्ड बी अस्पतालले बिरामीको सिटी स्क्यान नगरेको कारण आन्तरिक रक्तश्रावबारे अस्पताल र बिरामीलाई जानकारी हुन नसकेको हो । बिरामीलाई भएको समस्याबारे समयमै जानकारी हुन नसक्दा आन्तरिक रक्तश्रावका कारण बिरामीको मृत्यु भएको आफन्तको आरोप छ ।

मृतकका परिवारले अस्पतालको लापरबाहीका कारण बिरामीको मृत्यु भएको भन्दै उपचारमा संलग्न डाक्टरलाई कारबाही र मृतकका परिवारलाई क्षतिपूर्तिको माग गरेका छन् । अस्पतालले छलफलका लागि बिहान ९ बजेको समय दिए पनि बिहान साढे ९ बजेसम्म छलफल हुन सकेको छैन । बिरामीका आफन्तले पाटन अस्पतालबाट अस्पताल परिसरमै शव ल्याई आन्दोलन गर्ने तयारी गरेका छन् ।