काठमाडौं, जेठ २८ ।
सामाजिक उत्तरदायित्वअन्तर्गत नेपाल राष्ट्र बैंकबाट ‘क’ वर्गको इजाजत पत्र प्राप्त संस्था सनराइज बैंक लिमिटेडको चन्द्रनिगाहपुर शाखाले दृष्टि आँखा अस्पताल, वीरगञ्ज, पर्सासँगको समन्वयमा निःशुल्क आँखा शिविर सफलतापूर्वक सञ्चालन गरेको छ । निःशुल्क आँखा शिविर कार्यक्रम श्रीमावि, डुमरिया चन्द्रपुर–९ मा सञ्चालन गरिएको थियो । सञ्चालन भएको सो शिविरबाट २ सय ४० स्थानीय बासिन्दाहरूले ओपीडी सेवा, आँखाको शल्यक्रियाका लागि परामर्श र सल्लाह तथा अन्य जाँच सेवाहरू लिएका थिए । शल्यक्रिया र औषधीको लागि डाक्टरको सल्लाह लिएका मानिसहरू खुसी हुँदै बैंकले सो शिविर आयोजना गरेकोमा धन्यबाद ज्ञापन गरेका थिए ।

शुक्रबार उक्त कार्यक्रमको उद्घाटन बैंकको मधेश प्रदेश प्रमुख दीपक पण्डित, जीवन विज्ञान केन्द्र मधेश प्रदेश प्रमुख शैलेश पौडेल, श्रीमावि डुमरिया चन्द्रपुरका मुख्य शिक्षक राजेशकुमार चौधरी, नयाँ नेपाल सेवा केन्द्रका स्वयंसेवक निर्मला चौधरी र बैंकका चन्द्रनिगाहपुर शाखा टोली सदस्यहरूको उपस्थितिमा आयोजना गरिएको थियो । दृष्टि आँखा अस्पताल, वीरगञ्ज र जीवन विज्ञान तथा नयाँ नेपाल सेवा केन्द्र, चन्द्रपुर रौतहट जस्ता सामाजिक संस्थाको प्राविधिक सहयोगमा विभिन्न सूचनामूलक र प्रबर्द्धनात्मक उपकरणको प्रयोग गरी निःशुल्क आँखा शिविर सफल बनाउन सहयोग पुगेको बैंकले एक प्रेस विज्ञप्ति जारी गरी जनाएको छ ।