काठमाडाैं, जेठ २९ ।
विगत चार दशकदेखि नेपाली भाषा र नेपालभाषामा निरन्तर रूपमा आफ्नाे कलम चलाउँदै आएका विश्व कीर्तिमानी साहित्यकार सुरेन्द्र महर्जन ‘अमर’को साहित्यिक कृति “अनौठो माया” (उपन्यास) एक भव्य समारोहकाबीच काठमाडाैंमा सार्वजनिक गरिएको छ । ओएस नेपालको आयोजनामा ओएस नेपाल म्युजिक अवार्ड-२०८० को नोमिनेसन प्रमाण-पत्र वितरण कार्यक्रमका प्रमुख अथिती माननीय अमनलाल मोदी संघीय मामिला तथा प्रशासन मन्त्री र विशेष अथिती एस. एस. पी. धनबहादुर कार्कीबाट संयुक्त रूपमा साहित्यकार सुरेन्द्र महर्जन ‘अमर’ द्वारा लिखित उपन्यास सार्वजनिक गरेका हुन् । कार्यक्रममा बोल्दै प्रमुख अथिती माननीय अमनलाल मोदी र विशेष अथिती एस. एस. पी. धनबहादुर कार्कीले अवार्डको प्रमाण-पत्र पाउने सबैलाई हार्दिक बधाई र साहित्यकार सुरेन्द्र महर्जन ‘अमर’लाई शुभकामना र सफलताको कामना व्यक्त गरे । वि.सं. २०७४ सालबाट निरन्तर रूमा साहित्य र कला क्षेत्रका पुस्तक एल्बमलगायत साहित्यकार अमरका कृतिहरू ओएस नेपालले प्रकाशन गर्दै आइरहेको र अझ मौका मिलेको खण्डमा उनको कृतिहरू अझै प्रकाशन गर्दै जाने ओएस नेपालका तर्फबाट विवेक कार्कीले बताएका छन् ।

“अनौठो माया” (उपन्यास) का लेखक सुरेन्द्र महर्जन ‘अमर’ ले आफ्नो उपन्यासभित्रका कथा काल्पनिक मात्रै नभएर अहिलेको जमानामा यथार्थमा पनि कहीँ कतै आफ्नो बनेर धोका दिने मान्छेहरू धेरै हुने भएका कारण कथालाई अलग्गै तरिकाले उपन्यासमा समेटिएको बताए । नाम र मान्छेलाई पात्रको कुनै माध्यमबाट सम्बोधन गरे पनि कसैलाई होच्याउने नगरिएको बताए । कथालाई पूर्णता दिन पात्रहरू आवश्यक पर्ने हुनाले कसैलाई पात्रको रूपमा समावेश गरेको उनले बताए । उपन्यासकार अमरले हालै सगरमाथा बेस क्याम ५३६४ मिटर अग्लो स्थानमा आफ्नो २९ औँ कृति विमोचन गरेर विश्व कीर्तिमानी वर्ल्ड बुक अफ रेकर्ड राखेर विश्व कीर्तिमानी प्रमाण-पत्र हाँसिल गरिसकेका छन् । लेखनका साथसाथै उनी चित्रकारिता, गायनमा पनि उत्तिकै सशक्त सन् । उनको यसअघि कविता, गीत, हाइकु, एल्बम, गीति-कविता, उपन्यास, नेपाली कथानक गीति, चलचित्र गरेर ३१ भन्दा बढी कृति प्रकाशन भइसकेको छ भने यो उपन्यास उनको ३२ औँ कृति हो ।

उपन्यास सार्वजनिक कार्यक्रममा उपन्यासकार संघका अध्यक्ष शंकर भारतीले ‘अनौठो माया’ उपन्यास पढ्दा घटनाहरू कौतुहलपूर्ण छन् । पढेपछि छोड्नै मन हुँदैन, अन्त कसरी हुन्छ अब के होला भन्ने जिज्ञासा हुँदाहुँदै उपन्यासको अन्त हुन्छ । जसलाई मैले लेखकको सुन्दर कल्पना शक्ति र सो कल्पनालाई मूर्त रूप दिन सक्ने अनुभवि लेखन सिल्पिकै उपज मानेको छु । वरिष्ठ साहित्यकार सुरेन्द्र महर्जन “अमर” लाई सुन्दर सृजनाको लागि शंकर भारतीले शुभकामना एवं हार्दिक बधाई व्यक्त गरेका छन् ।