काठमाडाैं, जेठ २९ ।
काठमाडौं महानगरपालिकाले दुई अस्पतालमा तालाबन्दी गरेको छ । दर्तासमेत नगरी सञ्चालनमा रहेको काठमाडौं-६ बौद्धस्थित चाइनिज पिपुल्स अस्पताल र वडा नम्बर-३२ जडिबुटीस्थित सहयात्री अस्पतालमा ताला लगाइएको महानगरपालिका जनस्वास्थ्य विभागका प्रमुख रामप्रसाद पौडेलले जानकारी दिए ।

‘स्वास्थ्य जस्तो संवेदनशील सेवा प्रदान गर्ने ठाउँ दर्ता नै नभएको पाइएपछि बन्द गराएका हौँ,’ पौडेलले भने । दर्ता नै नगरी सञ्चालन हुने स्वास्थ्य संस्थालाई जिम्मेवार बनाउन तालाबन्दी गरिएको उनको भनाई छ ।

दुबै अस्पताल १५/१५ शय्याका हुन् । चाइनिज पिपुल्स अस्पतालमा अक्युपञ्चर र पाइल्सको उपचारमा केन्द्रित थियो । विभागका प्रमुख पौडेलकाअनुसार सहयात्रीमा गर्भपतन सेवा दिने गरिएको थियो ।

विभागले लक्षित वर्गलाई उपलब्ध गराउनु पर्ने सेवाको नियमित निगरानी र अनुगमन गरिरहेको छ ।