काठमाडौं, जेठ ५ ।
इंग्लिस प्रिमियर लिग फुटबलअन्तर्गत बिहीबार राति भएको खेलमा टोटनह्याम हट्सपरले शानदार जित दर्ता गरेको छ । अवे मैदानमा भएको खेलमा टोटनह्यामले अघिल्लो सिजनको च्याम्पियन लेस्टर सिटीलाई उसैको मैदानमा ६–१ ले हराएको हो ।

टोटनह्यामको जितमा ह्यारी केनले ४ गोल गरे । थप २ गोल सन हेङ–मिनले गरे । लेस्टरका लागि चिलवेलले एक गोल फर्काए ।

लेस्टर सिटीसँगको खेलमा चार गोल गरेका केन यो सिजन लिगमा सर्वाधिक गोल गर्ने खेलाडीको सूचिमा शीर्ष स्थानमा उक्लिएका छन् ।

एक खेल बाँकी हुँदा अहिलेसम्म उनले २६ गोल गरेका छन् भने सात गोलका लागि सहयोग गरेका छन् । दोस्रो स्थानमा रहेका एभर्टनका रामेलु लुकाकुले २४ तथा तेस्रो स्थानमा रहेका आर्सनलका एलेक्स सान्चेजले २३ गोल गरेका छन् ।