काठमाडौं, असार ६ ।
सिनेमा हल व्यावसायीले काठमाडौं महानगरपालिकाका मेयर बालेन साहविरुद्ध अदालतमा मुद्दा दायर गरेका छन् । उनीहरूले आज बुधबार उच्च अदालत पाटनमा मुद्दा दायर गरेका हुन् ।

“हिन्दी सिनेमा काठमाडौंमा प्रदर्शन गर्न रोक लगाउने काठमाडौं महानगरपालिकाका मेयर बालेन साह र काठमाडौं महानगरलाई विपक्षी बनाउँदै हामीले आज मुद्दा दर्ता गराएका छौँ,” प्रज्ज्वल शमशेर राणाले भने, “आज पेसी चढेन । चाँडै पेसी चढ्ने र फैसला आउने हाम्रो अपेक्षा छ ।”

काठमाडौं महानगरपालिकाका मेयर बालेनले सोमबारबाट कामपाभित्रका सिनेमा घरमा ‘आदिपुरुष’लगायत हिन्दी सिनेमा चलाउन नदिने बताएका थिए । सोही दिनबाट कामपा भित्रका सिनेमा घरमा हिन्दी सिनेमा रिलिज भएका छैनन् । ‘आदिपुरुष’ भने वितरकले देशभरका हलबाट उतारिसकेका छन् ।

संघीय सरकारले हिन्दी सिनेमा ‘आदिपुरुष’ सेन्सर गरेर चलाउन अनुमति दिएको अवस्थामा स्थानीय सरकारले रोक्न नमिल्ने भन्दै सिनेमा घर सञ्चालकहरूले बताउँदै आएका छन् ।

सिनेमा चलाउन दिने अधिकार संघ सरकारको हो कि स्थानीय सरकारको हो भन्दै उनीहरूले प्रश्न उठाएका छन् ।