काठमाडाैं, असार १७ ।
दीपेन्द्र सिंह ऐरीले सानदार ब्याटिङ गरेपछि नेपालले विश्वकप छनोट क्रिकेटको सातौँ स्थानको प्ले अफ सेमिफाइनलमा यूएईविरुद्ध ३ विकेटको विजय हात पारेको छ ।

जिम्बावेको हरारेमा यूएईले दिएको १ सय ८२ रनको सामान्य लक्ष्य नेपालले ४३ ओभर २ बलमा ७ विकेटको क्षतिमा पूरा गर्यो ।

नेपालका दीपेन्द्र सिंह ऐरीले ७९ र सन्दीप लामिछानेले नटआउट २३ रन बनाए । नेपालले ६६ रन बनाउँदा ६ विकेट गुमाइसकेको थियो ।

त्यसपछि सन्दीप र दीपेन्द्रले उत्कृष्ट साझेदारी गरेर नेपाललाई जित दिलाए । यसअघि जिम्बावेको हरारेमा जितेर बलिङ रोजेको नेपालले उत्कृष्ट बलिङ गर्यो ।

पहिले ब्याटिङ गरेका यूएई ४६ दशमलव ५ ओभरमा १ सय ८१ रनमा अलआउट भएको हो । नेपालका सन्दीप लामिछाने र करण केसीले ३/३ विकेट लिए । गुल्सन झा, प्रतिश जिसी र दीपेन्द्र सिंह ऐरीले १/१ विकेट लिएका थिए ।

यूएईका लागि वृत्य अरविन्दले सर्वाधिक ४४ र रोहन मस्तफाले ३५ रन बनाए । नेपालले अब पर्सि मंगलबार प्लेअफको फाइनलमा आयरल्याण्डसँग प्रतिस्पर्धात्मक खेल खेल्नेछ ।