काठमाडाैं, असार १८ ।
नेपाल यू-१६ एसीसी इस्ट जोन कप क्रिकेट प्रतियोगिताको फाइनलमा प्रवेश गरेकाे छ । मलेसियाको बायोमास ओभल क्रिकेट मैदानमा आज सोमबार नेपालले सिंगापुरलाई ९७ रनले हराएको हो ।

१ सय ८५ रनको लक्ष्य पछ्याएको सिंगापुर ३१ दशमलव ३ ओभरमा ८७ रन बनाएर अलआउट भयो । सिंगापुरका लागि रोशन रविचन्द्रनले २४ र प्रनभ धनुकाले १४ रन बनाएका थिए ।

नेपालका कृतिक कामातले ३ तथा अभिषेक तिवारी, अशोक धामी, प्रतिक पोखरेल, सन्तोष यादव र नरेनले १-१ विकेट लिएका थिए ।

पहिले ब्याटिङ गरेको नेपालले निर्धारित ३५ ओभरमा ९ विकेट गुमाउँदै १ सय ८४ रन बनाएको थियो । सुर्यांशु कोइरालाले ४३ र ओपनर निरज यादवले ४२ रन बनाए ।

प्रतियोगितामा ७ टोली सहभागी छन् । उपाधिका लागि नेपालले आयोजक मलेसियासँग प्रतिस्पर्धा गर्ने भएकाे छ ।