काठमाडाैं, असार १८ ।
ललितपुर महानगरपालिकाले ज्येष्ठ नागरिक र अपाङ्‍गता भएका व्यक्तिहरूलाई अबदेखि घरमै गएर उपचार गरिदिने भएको छ ।

ज्येष्ठ नागरिक र अपाङ्‍गता भएका व्यक्तिहरूको मुटु, मिर्गौला, आँखालगायतको परीक्षणका साथै विशिष्ट स्वास्थ्य सेवा घरमा नै गएर सेवा दिने व्यवस्था मिलाएको महानगरले जनाएको छ ।

‘महानगरसँग ज्येष्ठ नागरिक’ कार्यक्रममार्फत् घर-घरमा गएर ज्येष्ठ नागरिक र अपाङ्‍गता भएका व्यक्तिहरूको स्वास्थ्य परीक्षणलगायत आवश्यकताअनुसार आधारभूत औषधी पनि निःशुल्क उपलब्ध गराइने महानगरले जनाएको छ । जसका लागि महानगरले नेपाल हृदय रोग निवारण र नेपाल नेत्र ज्योति संघ (कीर्तिपुर आँखा अस्पताल)सँग समझदारी गरेको छ ।

समझदारी पत्रमा ललितपुर महानगरपालिकाका मेयर चिरीबाबु महर्जन, नेपाल हृदय रोग निवारण प्रतिष्ठानका अध्यक्ष बलराम न्यौपाने र नेपाल नेत्र ज्योती संघका अध्यक्ष भरतबहादुर चन्दले संयुक्त रूपमा हस्ताक्षर गरेका छन् ।

यस्तै, मिर्गौलासम्बन्धी रोगको उपचार गर्ने सम्बन्धमा मेडिसिटी अस्पताल , मिर्गाैला बचाउ अभियान र ललितपुर महानगरबीच समझदारी भएको महानगरले जनाएको छ । महानगरका मेयर महर्जन, मेडिसिटीका मेसु राज राणा, अभियानका ऋषिराम काफ्लेले त्रिपक्षीय गरेका हुन् ।

महानगरका ज्येष्ठ नागरिकको स्वास्थ्यसँग जोडिएको विषय भएकाले महानगरको तर्फबाट कुनै कसर बाँकी नराख्ने मेयर महर्जनले बताएका छन् ।