काठमाडाैं, असार २८ ।
बङ्गलादेशकाे राजधानी ढामामा आज बिहीबार भएकाे पहिलो मैत्रीपूर्ण फुटबल खेलमा नेपालले बङ्गलादेशसँग बराबरी खेल खेलेकाे छ । ढाकाको कमलपुरस्थित वीर श्रेष्ठ शहीद सिपाही मोहम्मद मुस्तफा कमल स्टेडियममा भएको खेलमा नेपालले बङ्गलादेशसँग १–१ गोलको बराबरी खेलेको हो ।

पहिलो हाफसम्म दुबै टाेलीले गोलरहित बराबरीमा खेल खेलेको थियाे । खेलमा बङ्गलादेशले ६५ औँ मिनेटमा सुरुवाती गोल गरेको थियो । बङ्गलादेशका लागि सबिना खातुनले गोल गरेकी थिइन् । त्यसपछि जोसिएको नेपालले दोश्राे हाफको इञ्जुरी समयमा बराबरी गोल फर्काउन सफल भएकाे थियाे ।

नेपालका लागि साबित्रा भण्डारीले बराबरी गोल गरेकी थिइन् । राष्ट्रिय टोलीबाट साबित्राको यो ४४ औँ गोल हो । उनी नेपालका लागि सर्वाधिक गोल गर्ने खेलाडीसमेत हुन् ।

नेपालले यसअघि बङ्गलादेशसँग गत वर्ष काठमाडौंमा भएको साफ महिला च्याम्पियनशीपमा प्रतिस्पर्धा गरेको थियो । त्यतिबेला नेपाल बङ्गलादेशसँग ३–१ गोल अन्तरले पराजित भएको थियो ।