काठमाडाैं, श्रावण २ ।
काठमाडौंको चन्द्रागिरी नगरपालिका-९ स्थित मत्स्यनारायण मन्दिरमा ‘मत्स्यनारायण मेला’ आज मंगलबारदेखि सुरु भएको छ । तीन वर्षको अन्तरालमा पर्ने पुरुषोत्तम महिना (मलमास)मा सो मन्दिरमा मत्स्यनारायणको मेला लाग्ने गर्दछ ।

यो महिनालाई अधिक मास महिना पनि भन्ने गरिन्छ । एक महिनामा दुई वटा औँसी पर्यो भने उक्त महिनालाई पुरुषोत्तम (मलमास, अधिक) मास भन्ने धार्मिक तथा शास्त्रीय मान्यता रही आएको छ ।

चन्द्रागिरी-९ का वडाध्यक्ष अच्युत अधिकारीले आजदेखि सुरु भएको मत्स्यनारायण मेला एक महिनासम्म चल्ने जानकारी दिएका छन् । मलमासको अवधिभर उक्त मेलामा नेपाल तथा भारतबाट समेत भक्तजन दर्शन गर्न आउने उनको भनाई थियो । मलमास अवधिभर सो मन्दिरमा नारायणको पूजा/पुरुषोत्तम महात्म्य वाचन गर्ने परम्परा छ । भगवान् नारायणको पूजा आराधना गर्नाले सम्पूर्ण पाप नष्ट हुन्छन् भन्ने धार्मिक विश्वाससमेत रहेको छ ।