काठमाडाैं, श्रावण १४ ।
आफ्नै घरमा झुण्डिएको अवस्थामा मृत फेला परेका कलाकार सारुक ताम्राकारको मोबाइलमा सुसाइट नोट फेला परेको छ ।

प्रहरीले ताम्राकारको मोबाइल परीक्षणका लागि डिजिटल फरेन्सिक ल्याबमा पठाएको थियो । ल्याबमा परीक्षण गर्दा ताम्राकारको मोबाइलमा सुसाइट नोट फेला परेको जिल्ला प्रहरी परिसर काठमाडौंका प्रमुख, प्रहरी वरिष्ठ उपरीक्षक (एसएसपी) दानबहादुर कार्कीले जानकारी दिएका छन् ।

सारुक मृत्युको घटनाबारे अनुसन्धान गरिरहेका प्रहरी अधिकृतकाअनुसार उनले सुसाइट नोटमा कसैलाई पनि आक्षेप लगाएका छैनन् । उनले आफूबाट कमजोरी भएको र त्यसमा कसैलाई दु:ख नदिन भनेर नोटमा लेखेको ती अनुसन्धान अधिकृतको भनाई छ ।

‘इट्स अल माई फल्ट, कसैलाई ब्लेम नगर्नु होला । यो सबै यहीँ इन्ड हुनु थियो, सो सकियो । लेट मि रेस्ट इन पिस । धन्यवाद,’ ताम्राकारको सुसाइट नोटको ब्यहोरा उद्धृत गर्दै प्रहरी श्राेतले भन्यो ।

सारुक गत असार २१ गते, बिहीबार साँझ काठमाडौंको रातोपुलस्थित आफ्नो घरमा मृत फेला परेका थिए । प्रहरीले घटनास्थलमा चेकजाँच गर्दा कुनै नोट फेला पारेको थिएन । घटनास्थलमा फेला परेको उनको मोबाइल प्रहरीले परीक्षणका लागि प्रहरी प्रधान कार्यालयको डिजिटल फरेन्सिक ल्याबमा पठाएको थियो ।