काठमाडाैं, श्रावण २६ ।
नक्कली शैक्षिक प्रमाण पत्र प्रकरणमा थप एक जना पक्राउ परेका छन् । नेपाल प्रहरीको केन्द्रीय अनुसन्धान ब्यूरो (सीआईबी)ले सुमेरू सिटी हस्पिटलकी डा. पुनम थापा चौधरीलाई पक्राउ गरेको हो ।

यससँगै सीआईबीले चलाएको फक्सट्रट चार्ली अपरेशनमा हालसम्म ८ जना पक्राउ परेका छन् । आज बिहान मात्रै इशान बाल अस्पताल धापासीमा कार्यरत चिकित्सक श्रद्धा शिल्पकार र मोरङबाट मनिष चौधरी पक्राउ परेका थिए ।

ब्यूरोले बिहीबार कांग्रेस सांसद् सुनिल शर्मासहित महोत्तरीका डा. रञ्जितकुमार यादव, त्रिवि शिक्षण अस्पतालमा कार्यरत डा. अमित चौधरी, रौतहटका डा. रामबाबु यादव र डा. एरिना शाहलाई पक्राउ गरेको थियो ।

पक्राउ परेकाहरूलाई ब्यूरोले लाजिम्पाटस्थित आफ्नो नयाँ कार्यालयमा राखेको छ । ब्यूरोकी निर्देशक किरण बज्राचार्यले विगतदेखि नक्कली प्रमाण पत्र बाहक चिकित्सकहरूमाथि भइरहेको अपरेशनकै निरन्तरतामा विभिन्न व्यक्तिहरू पक्राउ परेको बताएकी छन् ।