काठमाडाैं, श्रावण ३१ ।
साढे दुई वर्षको अन्तरमा पर्ने पुरुषोत्तम मासमा मात्र लाग्ने मत्स्यनारायण मन्दिरको मेला आज बुधबारबाट सकिँदैछ ।

तर, औपचारिक समापन भने भाद्र १ गते गरिने संयोजकसमेत रहनुभएका चन्द्रागिरी नगरपालिका–९ का अध्यक्ष अच्युत अधिकारीले जानकारी दिएका छन् ।

काठमाडाैंको चन्द्रागिरी नगरपालिका–९ मा पर्ने मन्दिरमा अहिले दैनिक हजारौँ भक्तजनको भिड लाग्ने गरेको छ ।

मत्स्यनारायण कीर्तिपुर र सतुङ्गल दुबै ठाउँबाट जान सकिन्छ । दुबैतिरबाट मत्स्यनारायण जान सार्वजनिक यातायात पाइन्छ ।

कीर्तिपुर नगरपालिकाको वडा नम्बर–४ सँग जोडिएको मत्स्यनारायण क्षेत्र धार्मिक रूपमा महत्त्वपूर्ण भए तापनि यसको प्रचार–प्रसार गरी धार्मिक पर्यटक वृद्धिको काम हुन नसकेको स्थानीय बासिन्दाहरूको गुनासो रहेकाे छ । भगवान् बिष्णुका दश अवतारमध्ये पहिलो मत्स्य अवतार यही ठाउँमा लिएर उनले वेदको रक्षा गर्नुभएको विषय विभिन्न पुराणमा उल्लेख गरिएको छ ।

मत्स्य अवताररूपी भगवान् बिष्णुले जल मात्र पिएर सत्यब्रत राजासहित सप्तऋषिलाई मत्स्य पुराण सुनाउनु भएको थियो भन्ने विश्वास गरिन्छ ।

अहिलेसम्म २० लाखभन्दा धेरै भक्तजनले मन्दिरमा पूजा, आराधना एवम् दर्शन गरेको मेला व्यवस्थापन समितिले जनाएको छ ।