काठमाडौं, भाद्र ९ ।
कलाकार तथा जादुगर सानु ताम्राकारको ७४ वर्षको उमेरमा उपचारका क्रममा निधन भएको छ ।

काठमाडौंको थापाथलीस्थित नर्भिक अस्पतालमा उपचारका क्रममा आज शनिबार दिउँसो ३ बजेर २०  मिनेट जाँदा ताम्राकारको निधन भएको नेपाल चलचित्र कलाकार सङ्घका अध्यक्ष मोहन निरौलाले जानकारी दिएका हुन् ।

उनले भने, ‘विगत २४ दिनदेखि उपचाररत रहनु भएका उहाँ हामी माझ रहनु भएन । उहाँलाई भोलि आइतबार बिहान पशुपति आर्यघाटमा श्रद्धाञ्जली दिएर अन्त्येष्टि गर्ने तयारी छ ।’

अध्यक्ष निरौलाले कलाकार ताम्राकारको निधनले सङ्घसँगै आफू पनि मर्माहत भएको बताए ।

मेरी मामु, भुइँ मान्छे, ग्याम्ब्लर, पललगायतका चलचित्रमा अभिनय गर्नुभएका कलाकार ताम्राकारकी श्रीमती रुक्मणि ताम्राकार हुनुहुन्छ ।

ताम्राकारका छोरा सारुक ताम्राकारले गएको असार २१ गते आत्महत्या गरेका थिए । छोराले आत्महत्या गरेयता कलाकार ताम्राकार अस्वस्थ रहँदै आएका थिए ।