काठमाडाैं, भाद्र १० ।
क्रिकेटर सन्दीप लामिछानेविरुद्धको मुद्दामा पेशी पनि स्थगित भएको छ । न्यायाधीश प्रकाशकुमार पण्डितको इजलासमा परेको मुद्दा ‘हेर्न नभ्याइने’मा राखिएको हो ।

पेशीको सूचीमा पाँचौँ नम्बरमा रहेको मुद्दालाई समयको अभाव भएको भन्दै न्यायाधीशले हेर्न नभ्याउनेमा राखेका हुन् । याेसँगै सन्दीप भाेलि सोमबार एशिया कप क्रिकेट प्रतियोगिताका लागि पाकिस्तान प्रस्थान गर्ने भएका छन् । उनी यस मुद्दाकै कारण रोकिएका थिए । अरू खेलाडी भने पाकिस्तान पुगिसकेका छन् । आज आइतबारको पेशी स्थगित गरिएपछि अदालतले अर्को पेशी भाद्र २१ गतेकाे लागि तोकेको छ ।

एशिया कप भाद्र १३ गतेबाट सुरु हुँदैछ । नेपालको पहिलो खेल १३ गते पाकिस्तानसँग र दोश्राे खेल भारतविरुद्ध १८ गते रहेको छ । अर्को पेशीमा उपस्थित हुनुपूर्व उनले यी दुई म्याच खेल्न भ्याउनेछन् । यदि नेपालले अर्को चरणमा पुग्ने सम्भावना भयो भने सन्दीप पुनः नेपाल आएर पाकिस्तान फर्किनुपर्ने छ ।