काठमाडाैं, भाद्र ११ ।
भक्तपुरकाे प्रसिद्ध सिद्धपाेखरी जसलाई नेपालभाषामा नःपुखू भन्ने गरिन्छ । साे पाेखरीमा पर्यटन प्रबर्द्धनका लागि भन्दै ‘वाटर साइकल’ सञ्चालनमा ल्याइएको छ । भक्तपुर नगरपालिका-१, इताछेँस्थित रहेको उक्त सिद्धपाेखरीमा शनिबारदेखि वाटर साइकल सञ्चालनमा ल्याइएको हो । टीएन एडभेञ्चर्सले भक्तपुर नगरपालिकासँगको सहकार्यमा उक्त वाटर साइकल सञ्चालनमा ल्याएको हो ।

टीएन एडभेञ्चर्सका प्रबन्ध निर्देशक सुजन तिमिल्सिनाले आफूहरूले हाललाई ५ वटा ‘वाटर साइकल’ सञ्चालनका लागि अनुमति पाएको बताए । प्रबन्ध निर्देशक तिमिल्सिनाकाअनुसार एक जनाले २ सय रुपैयाँ तिरेपछि १५ मिनेट पोखरीमा वाटर साइकल चलाउन पाउने छन् । एउटा साइकलमा २ जनाले पोखरी घुम्न सक्छन् । बिदाको दिन बिहान ९ बजेदेखि बेलुका ७ बजेसम्म र बिदाबाहेकका दिनमा भने बिहान ११ बजेदेखि बेलुका ७ बजेसम्म वाटर साइकल सञ्चालनमा रहनेछ ।

वाटर साइकल चालक आफैँलाई पनि लाइफ ज्याकेट दिइने र उद्दार टोली पनि ‘स्ट्याण्डबाई’ रहने टीएन एडभेञ्चर्सले जनाएको छ । कम्पनीले निकट भविष्यमै सर्लाहीको भरत तालमा पनि वाटर साइकल सञ्चालनमा ल्याउने जनाएको छ ।