काठमाडाैं, भाद्र १३ ।
एशिया कप क्रिकेट आज बुधबारदेखि पाकिस्तानमा सुरु हुँदैछ । नेपालले उद्घाटन खेलमा घरेलु टीम पाकिस्तानसँग प्रतिस्पर्धा गर्दैछ ।

नेपालले इतिहासमै पहिलो पटक विश्व च्याम्पियन टोली पाकिस्तानसँग खेल्दै प्रतियोगिताको सुरुवात गर्ने भएको हो । ओडीआई क्रिकेट वरीयतामा शीर्ष स्थानको पाकिस्तान र नेपालबीचको खेल दिउँसो सवा ३ बजे मुल्तान क्रिकेट रंगशालामा सुरु हुनेछ ।

त्यसअघि, २ बजेतिर नेपाली गायिका डा. त्रिशाला गुरुङ र पाकिस्तानी गायिका ऐमा बाइगले प्रस्तुति दिनेछन् । गुरुङ त्यसका लागि पाकिस्तान पुगिसकेकी छन् । उनीहरूले मुल्तान क्रिकेट रंगशालामा प्रस्तुति गर्ने भएका हुन् । उनीहरूले राष्ट्रिय गीतलगायतको प्रस्तुति दिने छन् । यद्यपि प्रत्यक्ष प्रशारण भने हुने छैन ।

मुल्तान रंगशालाबाट डा. गुरुङले केही अन्तर्राष्ट्रिय प्रशारण नीतिहरूको कारण प्रत्यक्ष प्रशारण नहुने जानकारी दिएकी छन् । उनले भनेकी छन्, ‘दुर्भाग्यवश राष्ट्रिय गीत प्रदर्शन केही अन्तर्राष्ट्रिय प्रशारण नीतिहरूको कारण प्रत्यक्ष प्रशारण हुने छैन । तर, हामी पछि भिडियो अलग पोष्ट गर्नेछौँ । सहयोगको लागि धन्यवाद ।’