काठमाडाैं, भाद्र १५ ।
नेपाली राष्ट्रिय क्रिकेट टोलीका पूर्वकप्तान पारस खड्का वागमती प्रादेशिक क्रिकेट सङ्घको अध्यक्ष पदमा निर्वाचित भएका छन् ।

सङ्घको आज शुक्रबार सम्पन्न दोश्राे अधिवेशन तथा साधारण सभाले अध्यक्ष खड्कासहित १३ सदस्यीय नयाँ कार्यसमितिसमेत चयन गरेको छ । पारस आफ्ना प्रतिद्वन्द्वी उमेश पियालाई ९ मतको अन्तरले पछाडि पार्दै विजयी भएका हुन् ।

पारसले २३ मत प्राप्त गर्दा उमेशले १४ मत मात्र प्राप्त गरे । पारस काठमाडौं जिल्ला क्रिकेट सङ्घका कार्यसमिति सदस्य तथा उमेश चितवन जिल्ला क्रिकेट सङ्घका उपाध्यक्ष हुन् । त्यसैगरी २३ मत प्राप्त गरेका प्रेमबहादुर क्षेत्री उपाध्यक्षमा निर्वाचित भए । उनका प्रतिस्पर्धी रूपक रञ्जितले १४ प्राप्त गरेका थिए ।

यसैगरी, सचिवमा प्रशन्न शाक्य निर्वाचित भए । उनले २३ मत प्राप्त गरे । उनका प्रतिद्वन्द्वी प्रज्वल सापकोटाले १४ मत प्राप्त गरेका थिए । कोषाध्यक्षमा सञ्जय बस्नेत विजयी भए ।

त्यस्तै, सदस्यहरूमा अजयवीर पाण्डे, अनिल अधिकारी, सञ्जोग श्रेष्ठ, सुजन महर्जन, धीरज श्रेष्ठ, शेखर श्रेष्ठ र बसन्तराज सत्याल निर्वाचित भए ।

महिला सदस्यामा भने निरा राजोपाध्याय निर्विरोध निर्वाचित भए । मतदानमा छ जिल्लाका २४ र निवर्तमान कार्यसमितिका १३ सदस्य गरी कूल ३७ मत खसेको थियो ।

नेपाल क्रिकेट सङ्घ (क्यान) को केन्द्रीय चुनाव आगामी असोज पहिलो साता हुँदैछ । त्यसअघि ४५ जिल्ला र सात प्रदेशको निर्वाचन सम्पन्न भएको छ ।