ललितपुर, भाद्र २० ।
ललितपुरकाे सुनाकोठी क्षेत्रको विकास तथा ललितपुरलाई साँस्कृतिक एवं धार्मिक र पर्यटकीय स्थलका रूपमा विश्वसामु परिचित गराउने उद्देश्यले स्थापना गरिएको सम्भवतः विश्वकै सबैभन्दा अग्लो ढुंगाको आराध्यदेव भिंद्य: अर्थात भीमसेनकाे मूर्तिको छैठौँ स्थापना दिवस तथा भिंद्य: पुजा भाद्र २२ गते हुने भएको छ ।

सुनाकोठी समाजले वार्षिक रूपमा आयोजना गर्दै आएको भीमसेन जात्रालाई भविष्यमा पनि निरन्तरता दिइने आयोजक सुनाकोठी समाजका अध्यक्ष बिनोद डंगोलले बताए ।

उनले मच्छेगाउँको एउटा खोँचबाट ल्याइएको ६० टनको सिङ्गो ढुङ्गाबाट धेरै मेहनतपछि भीमसेनको मूर्ति बनाउन सफल भएको जानकारी दिए । सुनाकोठीमा भब्य तामझामका साथ छैठौँ बार्षिक उत्सव मनाउने तयारी अन्तिम चरणमा रहेको अध्यक्ष बिनोद डंगोलले बताएका छन् ।