काठमाडौं, माघ १९ ।
जारी रहेको इङ्गलिस प्रिमियर लिगको उपाधि होडमा धक्का पुगेको छ । गएराति भएको लिगअन्तर्गतको खेलमा आर्सनल वाट्फोर्डसँग २–१ गोलले पराजित हुँदै तेश्रो स्थानमा झरेको छ ।

घरेलु मैदानमा भएको खेलमा आर्सनल सुरुको १३ मिनेटभित्रै वाट्फोर्डसँग २ विरुद्ध शून्य गोलले पछाडि परेको थियो । वाट्फोर्डका लागि १० औँ मिनेटमा युनेस केबुल र १३ औँ मिनेटमा ट्रोय डिनीले गोल गर्दै २ विरुद्ध शून्य गोलले अग्रता दिलाएका थिए ।

पहिलो हाफसम्म २ विरुद्ध शून्य गोलले पछाडि रहेको आर्सनलका लागि ५८ औँ मिनेटमा एलेक्स इवोबीले एक गोल गरे । लुकास पेरेजले प्रहार गरेको बल पोस्टको माथिल्लो भागमा ठोक्किएर फर्किएपछि आर्सनलले बराबरी गर्न नसकेको हो । वाट्फोर्डले २८ वर्षपछि प्रमुख प्रतिस्पर्धामा आर्सनललाई हराएको हो । यसअघि, सन् १९८८ मा वाट्फोर्डले आर्सनललाई हराएको थियो । हारपछि शीर्ष स्थानको चेल्सीसँगको अंक दूरी छोट्याउने मौका गुमाएको आर्सनलको २३ खेलबाट ४७ अंक भएको छ ।

गएराति नै भएको खेलमा सण्डरल्याण्डसँग गोलरहित बराबरी खेलेको टोटनह्याम दोश्रो स्थानमा उक्लिएको छ । टोनटनह्यामको पनि ४७ अंक नै रहेको छ तर, गोल अन्तरको आधारमा उसले आर्सनललाई पछि पारेको हो । शीर्ष स्थानको चेल्सीको ५६ अंक भएको छ ।